അതെന്താ??

അതെന്താ???

 

കൊളങ്ങര പൈലേട്ടന്റെ മോള്‍ മേഴ്സിക്കുട്ടി അമേരിക്കയിലാണ്. മരുമാനും കൊച്ചുമക്കളും എല്ലാവരും അവിടെ തന്നെ.

ആണ്ടോടാണ്ട് കൂടുമ്പോള്‍ മേഴ്സിക്കുട്ടി & അസോസിയേറ്റ്സ് വെക്കേഷന് വരും. ഒരുമാസം. മേഴ്സിയുടെ ചെറുതിന് പ്രായം നാലേ ഉള്ളൂവെങ്കിലും മൊതൽ, മൂത്തവനേക്കാളും എന്തിന് സ്വന്തം  അപ്പനേക്കാളും ജഗജില്ലിയാണ്. എന്തുകേട്ടാലും എന്തുകണ്ടാലും സംശയമാണ്. 24 മണിക്കൂറ് സംശയം. കിടക്കപ്പായയിൽ നിന്നും രാവിലെ എണീറ്റ് വരുന്നത് തന്നെ സംശയവുമായാണ് 

ആദ്യമാദ്യം പൈലേട്ടന്‍ വൻ എൻകറേജ്മെൻ്റായിരുന്നു.  

"ഹായ്... മിടുക്കന്‍. മിടുമുടുക്കന്‍‍.. ഗുഡ് ക്വസ്റ്റ്യന്‍... അമേസിങ്ങ്... ബ്രൈറ്റ് ബോയ്" എന്നൊക്കെ പറഞ്ഞുവെങ്കിലും, പിന്നെ പിന്നെ... ബ്ലാക്ക് മോളി പ്രസവിക്കും പോലെ, ഒന്നിനുപുറകേ... ഡും ഡും ന്ന്  ഒന്നിനുപിറകേ ഒന്നായി വരുന്ന ചോദ്യങ്ങൾക്ക് ഉത്തരം പറഞ്ഞ് പറഞ്ഞ് ഒരു വഴിക്കായപ്പോള്‍ ആ അഭിപ്രായത്തിന് ഡിപ്രീസിയേഷന്‍ വന്നുകൊണ്ടിരുന്നു. 

പതിയെ പതിയെ... പൈലേട്ടന്‍ കൊച്ചിനെ കാണുമ്പോള്‍ അവിടന്ന് എത്രയും പെട്ടെന്ന് സ്കൂട്ടായി പാടത്തേക്കോ ടൗണിലേക്കോ പോയും തുടങ്ങിയത്രേ.

ഒരു ദിവസം, രാവിലെ പൈലേട്ടന്‍ കൈക്കോട്ടിന് മുളയുടെ പൂള്‍ വക്കുമ്പോള്‍ കൊച്ച് വന്ന് ചോദിച്ചു.

"അപ്പാപ്പാ... ഇതെന്താ?"

പൈലേട്ടന് ഫുൾ ഗൗരവത്തിൽ പറഞ്ഞു.

"കൈക്കോട്ട്!"

അത് പറഞ്ഞ് പൈലേട്ടൻ്റെ നാവ് പഴയ പൊസിഷണിലേക്ക് പോകും മുൻപ് അടുത്ത ചോദ്യം വന്നു.

"ഇതെന്തിനാ?"

പൈലേട്ടൻ്റെ കുരു ചെറുങ്ങനെ ഒന്ന് പൊട്ടി. എന്നാലും ആൾ സംയമനം പാലിച്ചുകൊണ്ട് പറഞ്ഞു.

"പറമ്പ് കിളക്കാന്‍"

അപ്പോൾ അടുത്ത ചോദ്യം.

"അതെന്തിനാ?"

ഇത് ഇവിടം കൊണ്ടൊന്നും തീരില്ലാന്ന് മനസ്സിലായ പൈലേട്ടൻ, ഇരുന്നിടത്തുനിന്നും ചാടിയെണീറ്റ് അക്രോശിച്ചുകൊണ്ട് പറഞ്ഞു:

"ഒരു വല്യ കുഴി കുത്തി എന്നേം നിന്റെ അമ്മാമ്മേം അതിലിട്ട് മൂടാന്‍!!!!!!!!!"

"പാമ്പുകടിക്കാന്‍... മനുഷ്യന് തലക്ക് ഒരു ത്വയിരം കിട്ടിയിട്ട് ആഴ്ച രണ്ടായി.. രോമം ക്ടാവേ... കൈക്കോട്ടും തായയാ എന്റെ കയ്യില്‍!"

😊