Saturday, January 12, 2008

ഇരുപതിനായിരം ഉറുപ്യ

നാട്ടിലെ ആദ്യകാല ഗള്‍ഫുകാരിലൊരാളാണ് ഗോപ്യേട്ടന്‍.

പാലട ശിവരാമന്‍ നായരുടെ പാലും വെള്ളം പോലുള്ള മനസ്സുള്ള മകന്‍‍, അഥവാ പാല്‍പ്പായസത്തിന്റെ പാ‍ല്പാട പോലുള്ള അഞ്ച് പെങ്ങന്മാരുടെ ആങ്ങള, മറ്റൊരു അഥവാ കൂടെ ചേര്‍ത്തുപറഞ്ഞാല്‍.., കുഞ്ഞിപ്പാലുവെന്ന ഓമനപ്പേരുള്ള ഞങ്ങള്‍ കൊടകരക്കാരുടെ സ്വന്തം ഗോപ്യേട്ടന്‍.

ഗോപ്യേട്ടന്റെ രീതികളായിരുന്നു ഈ ലോകത്തുള്ളവര്‍ക്കെല്ലാമെങ്കില്‍ ബാറായ ബാറുകളും ഷാപ്പായ ഷാപ്പുകളും ബീഡി, സിഗരറ്റ് കമ്പനികളുമെല്ലാം പൂട്ടിപ്പോകുമെന്നും പോലീസിനും വക്കീലന്മാര്‍ക്കും മൊത്തം പണി പോയി അവരുടെ കുടുമ്മം പട്ടിണിയാവുമെന്നും പൊതുവെ പറയും. അത്രക്കും ഡീസന്റ്. തനി 916. (ഹോള്‍ മാര്‍ക്ക് കാണാന്‍ വഴിയില്ല!)

പാരമ്പര്യമായി കിട്ടിയ പ്രകൃത്യാലുള്ള ഫ്രഞ്ച് താടിയുടെ താഴെയുള്ള കണക്ഷനങ്ങ് ഷേയ്‌വ് ചെയ്ത് നീക്കി, നല്ല ബ്രീഫ് കേയ്സിന്റെ പിടിപോലുള്ള മീശയും വച്ച് ജാസ്മിന്‍ സ്പ്രേയുമടിച്ച് വെള്ളയും വെള്ളയും ഇട്ട് പോകുന്ന ദുബായ്ക്കാരന്‍ ഗോപ്യേട്ടനെ ഭര്‍ത്താവായി കിട്ടാന്‍, കരയിലെ കെട്ടുപ്രായം തികഞ്ഞ ദാവണിയുടുത്ത ഹവ്വകളും, അളിയനായി കിട്ടാന്‍ കൈലിമുണ്ടുടുത്ത് കലുങ്കിലിരുന്നിരുന്ന ആദങ്ങളും റിഹേഴ്സലെടുത്തിരുന്നെന്ന് പറയപ്പെടുന്നു.

ഗോപ്യേട്ടന്‍ മീനാക്ഷി ചേച്ചിയെ കല്യാണം കഴിച്ചിട്ടും പടപടേന്ന് മൂന്ന് പിള്ളാരുണ്ടായിട്ടും, പെങ്ങന്മാരെ മൊത്തം കല്യാണം കഴിപ്പിച്ച് വിട്ടിട്ടും ജനത്തിന് ഗോപ്യേട്ടനോടുള്ള സ്‌നേഹത്തിന് കാര്യമായ കുറവൊന്നും വന്നില്ല, കല്യാണത്തിന്റന്ന് ചെറിയ മനപ്രയാസമുണ്ടായതൊഴിച്ചാല്‍!

എല്ലാ കൊല്ലവും ഡിസംബര്‍ മാസത്തിലാണ് ഗോപ്യേട്ടന്‍ ലീവിന് വരിക. കുളിര്‍ ക്ലൈമറ്റും പിന്നെ കൊടകര ഷഷ്ഠിയും കാര്‍ത്തികയും ക്രിസ്തുമസും വല്യപെരുന്നാളും വരിവരിയായി പിന്നെക്കെ പിന്നെക്കെ വരുന്ന ഏറ്റവും നല്ല മാസം.

ലാന്റ് ചെയ്താല്‍ ഒരാഴ്ചക്ക് ഗോപ്യേട്ടന്‍ അങ്ങിനെ വീടിന് പുറത്തിറങ്ങില്ല. ഗള്‍ഫില്‍ അതികഠിനമായ ജോലികള്‍ ചെയ്ത് വിറക് വെട്ടുകാരനെ പോലെ ക്ഷീണിച്ചവശനായി വരുന്ന ഗോപ്യേട്ടനെ, വാട്ടിയ കോഴിമുട്ടയും, മട്ടണും, മുരിങ്ങക്കായകൊണ്ടുണ്ടാക്കിയ പലവിധ തോരനുമൊക്കെ കൊടുത്ത് ഒന്ന് സുന്ദരകുട്ടപ്പനാക്കുവാനാണ് ഈ ആദ്യത്തെ ഒരാഴച കൂട്ടിലിടുന്നതെന്നാണ് ചേച്ചി പറയുക.

ഹവ്വെവര്‍, ആ ഒരാഴ്ച ഗോപ്യേട്ടന്റെ വീടിന്റെ ഭാഗത്തുനിന്ന് ചവര്‍ കൂട്ടിയിട്ട് കത്തിക്കുമ്പോള്‍ കേള്‍ക്കുന്ന പോലെ പൊട്ടലും ചീറലും കേള്‍ക്കുമെന്നും ഒരു നാട്ടുവര്‍ത്താനവുമുണ്ട്! അതെന്താണോ ആവോ?

ഒരു കൊല്ലത്തെ വിശേഷങ്ങള്‍ മുഴുവന്‍ പറഞ്ഞ് തീര്‍ക്കണ്ടേ? ദിവസങ്ങള്‍ എണ്ണിയെണ്ണിയിരിക്കുന്ന ഭാര്യക്കും ‘അച്ഛന്‍ വരാന്‍ ഇനി എത്ര ദിവസംണ്ടമ്മേ?’ എന്ന് ദിവസവും ചോദിക്കുന്ന കുട്ടികള്‍ക്കുമൊപ്പം സ്വസ്ഥമായി സ്വന്തം വീട്ടിലിരിക്കാന്‍ ആഗ്രഹിക്കാത്തവരാരാ ഉള്ളത്?

ഒരാഴ്ചത്തെ സുഖചികിത്സക്ക് ശേഷം മൊത്തം കുട്ടപ്പനായി പുറത്തിറങ്ങുന്ന ഗോപ്യേട്ടന്‍ അയലോക്കത്തും തറവാട്ടുവക അമ്പലത്തിലും പോയതിന് ശേഷം, നേരെ പോകുക കോഴിക്കോടുള്ള പഴേ ചങ്ങാതി അദ്രുമാന്റെ അടുത്തേക്കാണ്. ബോംബെയില്‍ വച്ച് കൂടിയ കൂട്ടാണ്. ഒരേ പാത്രത്തില്‍ നിന്നുണ്ട് ഒരേ പായയില്‍ കിടന്നുറങ്ങിയ സ്‌നേഹം, കൂട്ടുകാരന്‍ ഗള്‍ഫില്‍ നിന്ന് അവസാനിപ്പിച്ച് മടങ്ങിയിട്ടും ഗോപിയേട്ടന്റെ മനസ്സില്‍ പച്ചകുത്തിയ പോലെ കിടക്കുകയാണത്രേ..

അങ്ങിനെയൊരു വര്‍ഷം, അദ്രുമാനെ കാണാന്‍ പോയ ഗോപ്യേട്ടന് ജീവിതത്തില്‍ വല്ലാത്തൊരു കുരുക്കില്‍ പെട്ട കഥയുണ്ട്.

വീടുപണിക്ക് സഹായമായി അദ്രുമാന് കൊടുക്കാന്‍ കുറച്ച് കാശും കൊണ്ടാണ് ഗോപ്യേട്ടന്‍ അക്കൊല്ലം പോയത്. പക്ഷെ, സ്ഥലത്തെത്തിയപ്പോള്‍ അദ്രുമാന്റെ വീട്ടിലാരും ഇല്ല. എന്തോ മരണാ‍വശ്യമായി വീടടച്ചിട്ട് എല്ലാവരും പോയി ത്രേ. കുറെ നേരം കാത്തിരുന്ന് മുഷിഞ്ഞപ്പോള്‍, ‘ഞാന്‍ വന്നൂന്ന് പറയണം. അവനോട് അവിടേക്ക് ഒരു ദിവസം ഇറങ്ങാന്‍ പറയണം’ എന്ന് അടുത്ത വീട്ടില്‍ പറഞ്ഞ് ഗോപ്യേട്ടന്‍ തിരിച്ച് പോന്നു. തിരിച്ച് ദൂരം കുറെയില്ലേ!

കൊടകര നിന്ന് കോഴിക്കോടേക്കും തിരിച്ചും ആ ഒറ്റ ദിവസം യാത്ര ചെയ്ത് വരുമ്പോള്‍ ഒരാഴ്ചത്തെ സുഖചികിത്സകൊണ്ടുണ്ടായ ആ തുടിപ്പ് കഴിയും എന്നാണ് മീനാക്ഷിചേച്ചി പറയുക. വീട്ടില്‍ നിന്ന് പുറത്തിറക്കാതിരിക്കാനുള്ള മറ്റൊരു ന്യായം!

തിരിച്ച് വരുമ്പോള്‍ പ്രൈവറ്റ് ബസിലിരുന്നുറങ്ങുകയായിരുന്ന ഗോപ്യേട്ടന്‍ ഒരു ബഹളം കേട്ടാണ് കണ്ണുതുറന്നത്. രണ്ട് സീറ്റ് മുന്‍പില്‍ ഒരു വയോവൃദ്ധന്‍ നെഞ്ചില്‍ തടവിക്കൊണ്ട് ഉറക്കെ കരഞ്ഞുകൊണ്ട് പറയുന്നു.

“ന്റെ ബാഗിലുണ്ടായിരുന്ന കാശ് കാണണില്ല!!”

എല്ലാവരും കൂടെ ശ്രദ്ധിച്ച കൂട്ടത്തില്‍ ഗോപ്യേട്ടനും നോക്കി ആളെ.

ഒരു വെറും സാധാരണക്കാരന്‍. അതോ അതില്‍ താഴെയുള്ളവനോ. കഷ്ടപ്പാടിന്റെ ഏറ്റവും അറ്റത്ത്നില്‍ക്കുന്ന ആ മനുഷ്യന്റെ രൂപം വളരെ ദൈന്യം. തലയില്‍ ഒരു മുണ്ട് കെട്ടിയിട്ടുണ്ട്. നരച്ച താടിയും മുടിയും കരുവാളിപ്പ് പടര്‍ന്ന മുഖവും.

‘ന്റെ മോള്‍ടെ കല്യാണത്തിനായി കടം വാങ്ങി കൊണ്ടുവരുന്ന കാശാണ്. എടുത്ത ആള്‍ ആരായാലും, ദൈവത്തെ ഓര്‍ത്ത് എനിക്കത് തരണം. കാശില്ലാതെ എന്റെ വീട്ടിലേക്ക് പോകാന്‍ എനിക്ക് വയ്യ!’

‘ഇത്രക്കും ഗത്യന്തരമില്ലാത്ത ഒരു മനുഷ്യനെ പോക്കറ്റടിച്ച ആ കണ്ണില്‍ ചോരയില്ലാത്ത ദുഷ്ടന്മാരും ലോകത്തുണ്ടോ?’ എന്നോര്‍ത്ത് നില്‍ക്കേ ഡ്രൈവര്‍ വണ്ടി നിര്‍ത്തുകയും.

‘മര്യാദക്ക് കാശ് എടുത്തോന്‍ കൊടുത്തോ. കള്ളന്‍ വണ്ടിയില്‍ തന്നെ ഉണ്ട് എന്നുറപ്പാണ്. പോലീസ് സ്റ്റേഷനിലേക്കാ‍ ഇനി പോകുക‘

ആരുമാരം കുറ്റം ഏല്‍ക്കാതായപ്പോള്‍, ‘വണ്ടി നേരെ സ്റ്റേഷനില്‍ പോട്ടേ’ എന്ന് എല്ലാവരും കൂടി പറഞ്ഞപ്പോള്‍ വണ്ടി നേരെ അടുത്ത പോലീസ് സ്റ്റേഷനിലേക്ക് വിട്ടു.

അതുവരെ, ഗോപ്യേട്ടന് പണം നഷ്ടപ്പെട്ട ഒരു സാധു വൃദ്ധനോടു

ള്ള സഹതാപവും മോഷ്ടിച്ച ദുഷ്ടനോടുള്ള ദേഷ്യവുമല്ലാതെ മറ്റൊന്നും മനസ്സില്‍ തോന്നിയില്ലെങ്കിലും പൊടുന്നനേയാണ് അതുവരെ തോന്നാത്ത തരം ഒരു റ്റെന്‍ഷന്‍ മനസ്സില്‍ അരിച്ച് കയറുന്നത്.

‘ഇരുപതിനായിരം ഉറുപ്പിയ ഉണ്ടാക്കാന്‍ ഞാന്‍ രണ്ടുമാസായി നടക്കുന്നു. അവസാനം ഒരു ദിക്കീന്ന് കയ്യും കാലും പിടിച്ച് ഒപ്പിച്ചോണ്ടുവന്ന കാശാ ദ്. ഞാന്‍ ചാവുകയേ ഉള്ളൂ. സത്യം’ എന്ന് പറഞ്ഞത് കേട്ടപ്പോള്‍!

ഗോപ്യേട്ടന്റെ കയ്യിലും ഉണ്ടായിരുന്നത് ഇരുപതിനായിരം ഉറുപ്പികയായിരുന്നു.

‘ഇനി പോലീസ് പരിശോധിക്കുമ്പോള്‍ എന്റെ കയ്യിലിരിക്കുന്നത് ആളുടെ പൈസയാണെന്നെങ്ങാന്‍ പറയുമോ?’ എന്ന ഒരു അനാവശ്യ ചിന്ത ഗോപ്യേട്ടനെ പിടികൂടി.

‘ഏയ്. എന്തിനാ അത്. എന്റെ കയ്യില്‍ ഇരുപതിനായിരം രൂപയുണ്ടെങ്കില്‍ അതെങ്ങിനെ ആളുടെ ആവും?’ ഞാനെന്തിനാ റ്റെന്‍ഷനടിക്കുന്നത്? എന്നൊക്കെ പല ആവര്‍ത്തി ഗോപ്യേട്ടന്‍ മനസ്സില്‍ പറഞ്ഞെങ്കിലും, അറിയാത്ത നാട്, സ്ഥലം, ആളുകള്‍ എന്നൊക്കെ ഓര്‍ത്ത് വെറുതെ, റ്റെന്‍ഷന്‍ കൂടിക്കൂടി വരുന്നതല്ലാതെ കുറയുന്നില്ല.

പോലീസ് സ്റ്റേഷന്‍ എത്തിയപാടെ,

‘ഒരാളും ബസില്‍ നിന്നിറങ്ങരുത്!!’ എന്ന് പറഞ്ഞ് കണ്ടെക്ടര്‍ സ്റ്റേഷന്റെ അകത്തേക്ക് കയറിപ്പോവുകയും പിന്നാലെ തടിച്ച് ഗൌരവമുള്ള മുഖമുള്ള എസ്.ഐ.യും കൂടെ രണ്ട് പോലീസുകാരും കൂടെ വണ്ടിയുടെ അടുത്തേക്ക് വന്നു.

വന്ന വശം, എല്ലാവരോടും ഓരോരുത്തരായി താഴെയിറങ്ങാന്‍ പറഞ്ഞതിന്‍ പ്രകാരം, ഓരോരുത്തരായി ഇറങ്ങി വരിയായി നിരന്ന് നിന്നു. വരിയുടെ മധ്യത്തിലായി ഗോപ്യേട്ടനും.

ആദ്യം നിന്ന ആളിനോട് കയ്യിലുള്ള കാശെല്ലാം എടുക്കാന്‍ പറഞ്ഞു. ആള്‍ എടുത്തു കാണിച്ചു.

പിന്നെ രണ്ടാമത്തെ ആള്‍, മൂന്നാമത്തെ ആള്‍. അതിനിടക്ക് കാശെടുക്കാന്‍ കൈവിറച്ച് നിന്ന ഒരാളോട്

‘ഡോ..നിനക്കെന്താടാ കാശെടുക്കാന്‍ ഇത്ര മടി?’ എന്ന് ചോദിക്കുന്നതും കണ്ടു.

തന്റെ അടുത്തെത്താറായപ്പോഴേക്കും ഗോപ്യേട്ടന് റ്റെന്‍ഷന്‍ കൊണ്ട് നേരെ നില്‍ക്കാന്‍ പോലുമാവാത്ത അവസ്ഥയിലായി. അതുകൊണ്ട്, ഗോപ്യേട്ടന്‍ വരിയില്‍ നിന്ന് മുന്പോട്ട് വന്ന് പോലീസുകാരന്റെ അടുത്ത് പോയി പറഞ്ഞു.

‘സാറെ. ഞാന്‍ തൃശ്ശൂര്‍ കൊടകരയുള്ള ആളാണ്. എന്റെ കയ്യില്‍ ഒരു ഇരുപതിനായിരം ഉറുപ്പികയുണ്ട്. ഞാന്‍ കോഴിക്കോടുള്ള അദ്രുമാന്‍ എന്ന് പേരുള്ള എന്റെ കൂട്ടുകാരന് കൊടുക്കാന്‍ കൊണ്ടുവന്നതാണ്. ദൈവത്താനെ അത് ഇദ്ദേഹത്തിന്റെ പോക്കറ്റടിച്ചതാണെന്നൊന്നും പറയരുത്’ എന്ന്.

ഇത് കേട്ട് പോലീസുകാരും വണ്ടിയിലുള്ളവരും ഗോപ്യേട്ടനെ നോക്കി.

‘സംശയത്തിന്റെ പേരില്‍ തന്റെ കാശൊന്നും ഇവിടെ ആരും തട്ടിപ്പറക്കില്ല. താന്‍ റ്റെന്‍ഷന്‍ അടിക്കണ്ട!’ എന്ന് പറയുമെന്ന് പ്രതീക്ഷിച്ച ഗോപ്യേട്ടനോട്

‘ഫ! തെണ്ടി നായിന്റെ മോനേ... നീ വണ്ടിയില്‍ നിന്ന് ഇറങ്ങിയത് കണ്ടപ്പോള്‍ തന്നെ ഞങ്ങള്‍ക്ക് മനസ്സിലായി, നീ തന്നെയാണ് ഈ കാശ് അടിച്ചതെന്ന്. എന്നിട്ട് നീ മുന്‍ കൂറ് ജാമ്യമെടുക്കുന്നോടാ പട്ടീ!!” എന്ന് പറഞ്ഞ് ഗോപ്യേട്ടന്റെ ഷര്‍ട്ടിന്റെ കോളറില്‍ പിടിച്ച് വലിച്ച് സൈഡിലേക്ക് മാറ്റിയങ്ങ് നിര്‍ത്തി.

സംസാരശേഷി വരെ നഷ്ടപ്പെട്ട് നില്‍ക്കുന്ന ശുദ്ധനില്‍ ശുദ്ധഗതിക്കാരനായ ഗോപ്യേട്ടനെ മറ്റു യാത്രക്കാരെല്ലാം നോക്കി പല്ലിറുമ്മി,

‘ഇങ്ങ് വിട്ടു താ സാറേ... ഈ പാവം മനുഷ്യന്‍ കരഞ്ഞ് പറഞ്ഞിട്ടും കാശ് കൊടുക്കാത്ത ഇവനെ ഞങ്ങളൊന്ന് പെരുമാറട്ടേ.. വൃത്തികെട്ടവന്‍’ എന്ന് പറഞ്ഞ ബഹളം വച്ചു.

‘സത്യമായിട്ടും, എന്റെ അമ്മയാണേ.. എന്റെ കുഞ്ഞിപ്പിള്ളാരാണെ... ഇതെന്റെ കാശാണ്’ എന്ന് പറഞ്ഞപ്പോള്‍...

‘നീ കാശടിച്ചിട്ടില്ലെങ്കില്‍ പിന്നെ എന്തിനാടാ നിനക്കുമാത്രം ഇത്രേം പരാക്രമം. മറ്റു യാത്രക്കാരുടെ കയ്യിലൊന്നും കാശില്ലേ? ഇതൊക്കെ ഞങ്ങള്‍ സ്ഥിരം കാണുന്നതാഡാ..’

ജീവിതത്തില്‍ ഒരിക്കല്‍ പോലും മോഷ്ടിക്കാത്ത ആ പാവം സര്‍വ്വാംഗവും തളര്‍ന്ന്, എല്ലാവരുടേയും മുന്‍പില്‍ പെരും കള്ളനായി ഒന്ന് സംസാരിക്കാന്‍ പോലുമാവാതെ നിന്നു.

‘കാശെടുക്കടാ.. വേഗം!!’ എന്ന അക്രോശത്തില്‍ ഗോപ്യേട്ടന്‍ കയ്യിലുള്ള ബാഗില്‍ നിന്ന് കാശെടുത്തു. നൂറിന്റെ രണ്ട് കെട്ട് നോട്ടുകള്‍. ഒന്നിച്ചില്ലാനം മാസം ദുബായിലെ കൊടും ചൂടില്‍ പതിനാല് മണിക്കൂറ് ജോലി ചെയ്ത് ഉണക്ക റൊട്ടിയും ദാലും കഴിച്ച് സ്വരുക്കൂട്ടി ഉണ്ടാക്കിയ ആ ഇരുപതിനായിരം ഉറുപ്പിക.

‘ഡോ.. കാര്‍ന്നോരേ.. ഇത് ഒന്ന് എണ്ണി നോക്ക്യേ.. കറക്റ്റല്ലേന്ന്! ഇല്ലെങ്കില്‍ ഇവന് രണ്ടെണ്ണം കൊടുത്താല്‍ ബാക്കി കൂടെ എടുപ്പിക്കാം’ എന്ന് പറഞ്ഞ്, ഗോപ്യേട്ടന്റെ കയ്യില്‍ നിന്ന് വലിച്ച് വാങ്ങിയ പൈസ വൃദ്ധന്‌ കൊടുക്കുമ്പോള്‍ ഗോപ്യേട്ടന്റെ കണ്ണില്‍ നിന്ന് പൊടിഞ്ഞത് സങ്കടം കൊണ്ടുള്ള കണ്ണുനീരല്ല, ഇത്രേം പേരുടെ മുന്‍പില്‍ കള്ളനായ അപമാനത്തിന്റെ പേരില്‍ ചങ്കില്‍ നിന്ന് പൊടിഞ്ഞ ചോര തന്നെയായിരുന്നു. ചോര!

ഗോപ്യേട്ടന്‍ രണ്ടുകൈയും തലയില്‍ വച്ച്, നില്‍ക്കാന്‍ ശേഷിയില്ലാതെ താഴെ നിലത്ത് കുനിഞ്ഞങ്ങ് ഇരുന്ന് പോയി.

കയ്യില്‍ പൈസ കിട്ടിയ പാടെ സന്തോഷത്തിന്റെ ഒരു വേലിയേറ്റം തന്നെ മുഖത്ത് വന്ന ആ വൃദ്ധന്‍, നോട്ടിന്‍ കെട്ട് തിരിച്ചും മറിച്ചും നോക്കിയ ശേഷം ദൈന്യതയോടെ പറഞ്ഞു.

‘ഇതെന്റെ കാശല്ല!!‘

അത് കേട്ട് ഗോപ്യേട്ടനും വണ്ടിയിലുള്ളവരും പോലീസുകാരും അത്ഭുതത്തോടെ വൃദ്ധനെ നോക്കുമ്പോള്‍ ആള്‍ പറഞ്ഞു.

“എന്റെ കാശ് അമ്പതിന്റെ കെട്ടുകളായിരുന്നു!!!“

അത് കേട്ട്, ഗോപ്യേട്ടന്‍ തലയുയര്‍ത്തി നോക്കി. ജീവിതത്തിനും മരണത്തിനും ഇടയില്‍ നില്‍ക്കുമ്പോഴും ഹൃദയത്തില്‍ നന്മയും സത്യവും കാത്തുസൂക്ഷിക്കുന്ന ആ വൃദ്ധന്‍ , ‘ഇത് നൂറിന്റെ നോട്ടൂകളാണ്. ഇതെന്റെ കാശല്ല!’ എന്ന് വീണ്ടും പറഞ്ഞ് നോട്ടുകെട്ടുകള്‍ ഗോപ്യേട്ടന്റെ നേരെ നീട്ടീ.

അത് കേട്ടവശം, ഇരുന്നിടത്തുനിന്ന് ചാടിയെണീറ്റ് ഗോപ്യേട്ടന്‍ ഒരു അച്ഛനെ മകന്‍ ആശ്ലേഷിക്കും പോലെ കെട്ടിപ്പിടിച്ചുകൊണ്ട് പറഞ്ഞു:

“എനിക്ക് വേണ്ടാ ഈ പണം. എടുത്തോ...ഈ പണം നിങ്ങള്‍ തന്നെ എടുത്തോ. എനിക്ക് ഈ കാശിനേലും എത്രയോ വലുതാണ് ഇപ്പോള്‍ നിങ്ങള്‍ തിരിച്ച് തന്നത് എന്നറിയോ?? ഇത്രയും പേരുടെ മുന്‍പില്‍ വച്ച് കള്ളനായി മുദ്രകുത്തപ്പെടേണ്ട അവസ്ഥയില്‍ നിന്നാണ് നിങ്ങള്‍ എന്നെ രക്ഷപ്പെടുത്തിയത്.“

ഒന്നും പറയാനാവാതെ സ്തംബ്ദരായി എല്ലാവരും നില്‍ക്കുമ്പോള്‍ ഗോപ്യേട്ടന്‍, പാലട ശിവരാമന്‍ നായരുടെ പാലും വെള്ളം പോലുള്ള മനസ്സുള്ള ഞങ്ങളുടെ സ്വന്തം ഗോപ്യേട്ടന്‍ തിരിച്ച് വണ്ടിയില്‍ കയറി, ഇരുന്നിരുന്ന സീറ്റ് നോക്കി നടന്നു!

154 comments:

Visala Manaskan said...

2008 ലെ ആദ്യത്തെ പോസ്റ്റ്.

തമാശയല്ല, വിഷയം.

വെറും പറച്ചിലായി പോയോ എന്നൊരു സംശയമില്ലാതില്ല.

എല്ലാ ബൂലോഗര്‍ക്കും പുതുവത്സരാശംസകളോടെ,

വിശാല മനസ്കന്‍.
വീട് കൊടകരേലാ.

Unknown said...

എന്റമ്മേ.....നാളെ എന്റെ വക എല്ലാ ബ്ലൊഗ്ഗര്‍മാര്‍കും അന്നദാനം...2008 ലെ വിഷാലന്റെ ആദ്യത്തെ പൊസ്റ്റില്‍ കമ്മന്റ്‌ എഴുതാന്‍ എനിക്ക്‌ അവസരം കിട്ടിയേ.....കൂൂൂൂൂൂൂയ്‌....

തേങ്ങ വായിക്കുന്നതിന്‌ മുംബ്‌ ഉടക്കുന്നു....ട്ടൊ!!!!!

jabirshareef@yahoo.com

മൂര്‍ത്തി said...

തമാശകള്‍ക്കിടയില്‍ സീ‍രിയസും വേണം...
നവവത്സരാശംസകള്‍...

പ്രിയ ഉണ്ണികൃഷ്ണന്‍ said...

നന്നായിരിക്കുന്നു ശൈലി.

ആശംസകള്‍

Anonymous said...

നല്ല പോസ്റ്റ് മാഷേ...

മനസ്സുവച്ച് മാഷ് എന്തെഴുതിയാലും അത് വായിക്കാന്‍ നല്ലതാ. ഇടക്കൊക്കെ പതിവു മട്ടു വിട്ടുള്ള പോസ്റ്റു വരുന്നത് നല്ലതാണെന്നുള്ള അഭിപ്രായമാണെന്റേത്. അഭിനന്ദനങ്ങള്‍.

കൊടകരക്കാരനും പുരാണങ്ങള്‍ക്കും(സ്ക്രാപ്പുകള്‍ക്കും :- എന്റെ ഫേവറിറ്റ്സ്: വിശ്ശാലേട്ടനുമാത്രം വഴങ്ങുന്ന ഐറ്റംസ്...) തട്ടുപൊളിപ്പന്‍ 2008 !

സാജന്‍| SAJAN said...

അല്പം ഹാസ്യം കുറവുണ്ടോന്നൊരു സംശയം, സംശയമല്ല കുറവുണ്ട്,
ജീവിതം ഇത്ര തൊട്ടെടുത്തെഴുതുമ്പോ ഹാസ്യത്തിനു മിക്കവാറും കണ്ണീരിന്റെ നനവുണ്ടായാല്‍ എഴുത്തുകാരനെന്തു ചെയ്യാന്‍ കഴിയും,അല്ലേ?


പതിവുപോലെയല്ല, തനതായ ശൈലിയില്‍ ഈ പോസ്റ്റ് മികച്ചതായി!
ഒപ്പം ജീവിച്ചിരിക്കുന്ന ഒരു നല്ല മനുഷ്യനെ പരിചയപ്പെടുത്തിയതിനു അഭിനന്ദനങ്ങള്‍:)

tk sujith said...

വിശാലാ,ഇത്തരം ചില “വെറും പറച്ചിലുകളല്ലേ“ കൂടുതല്‍ നന്നായി ജീവിക്കാന്‍ ഓരോരുത്തരേയും നിരന്തരം പ്രേരിപ്പിക്കുന്നത്?
നന്മ നിറഞ്ഞ പുതുവര്‍ഷം ആശംസിക്കുന്നു.

ഹരിത് said...

വളരെ നന്നായ്യിട്ടുണ്ട്. ആശംസകള്‍

അനില്‍ശ്രീ... said...

ഹാസ്യം എപ്പോഴും വേണമെന്ന ശാഢ്യം ഒന്നുമില്ല...
ജീവിതത്തില്‍ നിന്നുള്ള കാമ്പുള്ള ഒരേട്..
അത് ഇങ്ങനെ എഴുതിയത് O.K.

ബിന്ദു said...

മനസ്സില്‍ തട്ടിയ എഴുത്ത്‌

സുല്‍ |Sul said...

നന്മനിറഞ്ഞ‍ വിശാലമനസ്കന്‍ ഗോപ്യേട്ടന്‍.
:)
-സുല്‍

Visala Manaskan said...

പ്രിയ ജാബിര്‍ > :) ഹഹ...അന്നദാനത്തിനെന്നേം വിളിക്കണം ട്ടാ.

മൂര്‍ത്തി > :) വാ‍യനക്കും അഭിപ്രായത്തിനും നന്ദിയുണ്ട്.

പ്രിയ > :) സന്തോഷം ട്ട.

ഗുപ്തന്‍ > :) ഇതൊരു പരീക്ഷണാടിസ്താനത്തില്‍ പൂശിയതാണ്. ഓരോന്നുമായും ഉപമിക്കാതേം ചില ആത്മഗതങ്ങള്‍ ഒഴുവാക്കിയും എഴുതാന്‍ പറ്റണില്ല. ഒരു ചേയ്ഞ്ചൊക്കെ വേണ്ടേ ല്ലേ? സ്ക്രാപ്പ് ഒന്ന് രണ്ടെണ്ണം കണ്ടിരുന്നു. പക്ഷെ, ഒക്കെ സ്ക്രാപ്പ് ആയി പോണൂ, എഴുതിവരുമ്പോള്‍. അതാ പോസ്റ്റാഞ്ഞെ.
സാജന്‍ >:) നന്ദി സാജാ. ഈ ഫോട്ടോ എനിക്ക് ഭയങ്കര ഇഷ്ടായിട്ടാ.
സുജിത്ത് >:) താങ്ക്സ് സുജിത്തേ. കുറച്ച് കൂടി സാഹിത്യ ഭാഷയില്‍ ഒക്കെ എഴുതണം എന്നാഗ്രഹം ഉണ്ട്. നടക്കണ്ടേ?? ഇഷ്ടായെന്നറിഞ്ഞതില്‍ സന്തോഷം.
ഹരിത് >:) സന്തൊഷം ചുള്ളന്‍
അനില്‍ ശ്രീ >:) പ്രോത്സാഹനത്തിന് നന്ദി.
ബിന്ദു >:) താങ്ക്സ് ഉണ്ട് ട്ടാ.
സുല്‍ >:) പ്രിയ സുല്‍.. ഗോപ്യേട്ടനേലും വിശാലമനസ്കന്‍ പാവം കാര്‍ന്നോരല്ലേ??? അങ്ങിനെയൊക്കെ എത്ര പേര്‍ക്ക് കഴിയും?

Sherlock said...

വെറും പറച്ചിലൊന്നും അല്ല വിശാലേട്ടാ......സത്യമായും എനിക്ക് ആനന്ദകണ്ണീര് വന്നില്ലേന്നൊരു സംശയം..:)

ഇടിവാള്‍ said...

നല്ല ക്ലൈമാക്സ്

നവവത്സരാശംസകള്‍

ചന്ദ്രകാന്തം said...

ഗോപ്യേട്ടനേക്കാള്‍ റ്റെന്‍ഷന്‍ തോന്നി, വായിച്ചുവന്നപ്പോള്‍.
പുതിയ വര്‍ഷത്തില്‍, നല്ലൊരു തുടക്കം കുറിച്ചതിന്റെ സന്തോഷം അറിയിക്കട്ടെ.

ആരോമല്‍ said...

സത്യം മാഷെ... അവസാനം ഗോപ്യേട്ടനെക്കാളും ടെന്‍ഷനായി നമുക്ക്

അഭിലാഷങ്ങള്‍ said...

വിശാല്‍ജീ..

2008 ലെ ആദ്യ പോസ്റ്റ് ഇരുകരങ്ങളും നീട്ടി സ്വാഗതം ചെയ്യുന്നു.

വളരെ ടച്ചിങ്ങ് ആയി എഴുതിയിട്ടുണ്ട്.

ശരിക്കും ഇഷ്ടമായി..

അഭിയുടെ അഭിനന്ദനങ്ങള്‍..

ഓഫ് ടോപ്പിക്ക്:

“തമാശകള്‍ക്കിടയില്‍ സീ‍രിയസും വേണം...“, “ഹാസ്യം എപ്പോഴും വേണമെന്ന ശാഢ്യം ഒന്നുമില്ല...“
- ഇതേ അഭിപ്രായം തന്നെയാണ് എനിക്കും. എങ്കിലും, പല ബ്ലോഗേസും അവരുടെ ബ്ലോഗുകളില്‍ ‘നര്‍മ്മം’ എന്ന ലേബലില്‍ ‘കൊടകരപുരാണ‘ത്തിന്റെ ലിങ്ക് കൊടുത്തിട്ടുള്ള സാഹചര്യത്തില്‍, വിശാല്‍ജിക്ക് നര്‍മ്മമല്ലാത്തവ കൈകാര്യം ചെയ്യാന്‍ സ്വന്തമായി വേറേയും ചില ബ്ലോഗുകള്‍ ഉണ്ട് എന്ന സാഹചര്യത്തില്‍, ഹാസ്യത്തിന് പേരുകേട്ട ‘കൊടകരപുരാണത്തില്‍‘ ഇത് പോലുള്ള കൂടുതല്‍ പോസ്റ്റുകള്‍ വരാതെ നോക്കണം എന്നാണ് എന്റെ വ്യക്തിപരമായ അഭിപ്രായം.

Visala Manaskan said...

അങ്കിള്‍ >:) വരവിനും കമന്റിയതിനും ഒരു നന്ദി വരവ് വച്ചാലും.

ജിഹേഷ് >:) താങ്ക്സ് ചുള്ളന്‍. :)

ഇടിവാള്‍ >:) ഇന്നലെ ഉറങ്ങാന്‍ പോയ നേരത്ത്, ‘അല്ലേ ഇതങ്ങട് എഴുതിയേക്കാം’ എന്ന പ്രചോദനം തന്നത് ഇടിവാളാണ്. വെറുതെ പറയല്ല. ശരിക്കും! സന്തോഷായി ഗോപ്യേട്ടാ..!!

ചന്ദ്രകാന്തം >:) ഉവ്വോ? എനിക്കത് കേട്ടാ മതി.

ആരോമല്‍ >:) താങ്ക്സ്. പണ്ട് ഗര്‍ഭപാത്രത്തില്‍ കിടക്കുമ്പോള്‍ എനിക്കുവേണ്ടി ഞാന്‍ കണ്ടുവച്ചിരുന്ന പേരുകളിലൊന്നായിരുന്നു, ആരോമല്‍. പക്ഷെ, വീട്ടുകാരെ അറിക്കാനോ കണ്വിന്‍സ് ചെയ്യാനോ‍ പറ്റിയില്ല. കമ്മ്യൂണിക്കേഷന്‍ പ്രോബ്ലം. :(

അഭിലാഷ് >:) പുത്യേ കൊല്ലമൊക്കെയല്ലെ..ഒരു നന്മയുടെ കഥ പറഞ്ഞ് തുടങ്ങാമെന്ന് വച്ചു ചുള്ളാ. :)
താങ്സബി.

ദിലീപ് വിശ്വനാഥ് said...

വിശാലേട്ടാ.. ആദ്യം പറയട്ടെ... പോസ്റ്റ് കലക്കി. ശരിക്കും ഹൃദ്യമായ ശൈലി.
പിന്നെ പറയട്ടെ... ഒരു വിശാലമനസ്കന്‍ ടച്ച് ഉണ്ടാവാതിരിക്കാന്‍ നോക്കിയിട്ടുണ്ടെങ്കിലും അത് ചീറ്റിപ്പോയി. അതില്ലാതെ വായിക്കാന്‍ വായനക്കാര്‍ക്കും പറ്റില്ല എന്നു കൂട്ടിക്കോ..

Anonymous said...

pocketadicha busile yathrakarante oru anubhavam enikkum undayeettundu? enthayalum nannayi!!!! basheerinte oru nalla manushyane orthupoyi????

ശെഫി said...

വിശാലാ, ഇതെനിക്കൊരുപാടിഷ്ടായി, സ്ഥിരം വഴിയില്‍ നിന്ന് മാറി നടന്നതു കൊണ്ടു പ്രത്യേകിച്ചും..(മരിക്കാന്‍ പോവുമ്പോല്‍ മണ്ണില്‍ കിടക്കണമെന്നു പറയുന്ന ഒരു വൃദ്ധനെ കുറിച്ചുള്ള പേരു മറന്ന ആ മസ്സില്‍ തട്ടുന്ന കഥ മറന്നു കൊണ്ടല്ല ഈ പരാമര്‍ശം)
വിശാലന്‍ എന്തെഴുതിയാലും തമാശയേ ആകാവൂ എന്ന ക്യാറ്റഗറൈഷന്‍ മാറേണ്ടതുണ്ടായിരുന്നു.
പതിവു പോലെ കലക്കന്‍, തമാശ കുറഞ്ഞൊ എന്നു സംശയം എന്ന പതിവു കമന്റുകള്‍ ഇനി വിശാലനുള്ള കമന്റുകളില്‍ നിന്ന് മാറി നില്‍ക്കുമല്ലൊ?

ഇത്ര ഹൃദയസ്പര്‍ക്കും സരസവുമായി എഴുതിയതിനു അഭിനന്ദങ്ങള്‍,
പ്രതീക്ഷിക്കുന്നു ഇനിയുമൊരുപാട്‌
എന്നു വെച്ചങ്ങ സീരിയസ്സ്‌ ആയി തമാശ വിടല്ലട്ട ഗഡ്യേ

tk sujith said...

വിശാലഗുരോ.ഇനി കൂടുതല്‍ സാഹിത്യഭാഷയിലേക്കൊന്നും അയ്യോ അയ്യോ പോകല്ലേ...ആ വിശാലന്‍ സ്റ്റൈലുണ്ടല്ലോ.അതല്ലേ അതിന്റെ ഒരിത്?

പപ്പൂസ് said...

വിശാലേട്ട്‍സ്... സത്യം പറയാല്ലോ, ഒരു വിശാല്‍ കഥ വായിച്ചതായി തോന്നിയില്ല. മറിച്ച് കണ്‍മുന്നിലങ്ങ് തെളിഞ്ഞതു പോലെ. കൊടകരക്കുന്നില് ഉറവ പൊട്ടിയ പോലെ തെളിഞ്ഞ എഴുത്ത്... ഹാപ്പി 2008! :)

Unknown said...

എന്തിനാ അങ്ങനൊരു മുന്‍ കൂര്‍ ജാമ്യം?തമാശ മാത്രേ എഴുതാന്‍ പാടുള്ളൂന്നുണ്ടാ?പാലുംവെള്ളം പോലത്തെ ഗോപ്യേട്ടനെ പെരുത്തിഷ്ടായീട്ടാ..
വിശാലാനന്ദ മഹര്‍ഷികള്‍ തപസ്സവസാനിപ്പിച്ച് ബൂലോകപ്രവേശം നടത്തിയതില്‍ സന്തോഷം :-)

krish | കൃഷ് said...

ഹായ് വിശാലാ.. അല്ലേലും ഒരു ചേയ്ഞ്ച് ആര്‍ക്കാ ഇഷ്ടല്ലാത്തത്.

ഇരുപതിനായിരം രൂ‍ഫാ.. ഫൂ‍ൂ.. മാനം കടലുകടന്ന് കള്ളനാവുന്നതിലും വലുതാണോ ഈ പണം.
ഹാസ്യപ്രധാനമല്ലെങ്കിലും ഒരു ‘സത്യ’ന്റെ ഗന്ധമുണ്ട് കഥക്ക്.
:)

കാവലാന്‍ said...

"ക്ഷീണിച്ചവശനായി വരുന്ന ഗോപ്യേട്ടനെ, വാട്ടിയ കോഴിമുട്ടയും, മട്ടണും, മുരിങ്ങക്കായകൊണ്ടുണ്ടാക്കിയ പലവിധ തോരനുമൊക്കെ കൊടുത്ത്........."
ഹഹഹ...

നല്ല നാലു നാട്ടു വര്‍ത്തമാനം കേട്ട സുഖം. കൊള്ളാം അഭിനന്ദനങ്ങള്‍.

Kaithamullu said...

പാവം മീനാക്ഷിയേച്ചി!

(ഒരു ചേയ്ഞ്ച് ആര്‍ക്കാ ഇഷ്ടല്ലാത്തത്, കമെന്റിലായാലും!)

അഞ്ചല്‍ക്കാരന്‍ said...

പോക്കറ്റടി നടന്ന ബസ്സിലെ യാത്രക്കാരോട് പോലീസിന്റ് “താനല്ലേടോ കള്ളന്‍” എന്ന രീതിയിലുള്ള പെരുമാറ്റം പാവം യാത്രക്കാരന്റെ ഹൃദയമിടുപ്പ് കൂട്ടുന്നത് തന്നെയാണ്. അതും നഷ്ടപ്പെട്ട പണത്തിന് തുല്യമായതാണ് തന്റെ കീശയിലുള്ളത് എന്നും കൂടിയായാല്‍ പിന്നെ പറയുകയും വേണ്ട. അതുകൊണ്ട് തന്നെ ഗോപ്യേട്ടന്റെ പരിഭ്രമം വായനക്കാരന്റെ ഹൃദയമിടുപ്പും കൂട്ടി.

ചിരിപ്പിക്കാനെഴുതിയാല്‍ ചിരിച്ച് ഒരു വഴിക്കാകും. ചങ്കിടുപ്പ് കൂട്ടാനായിട്ടെഴുതിയാല്‍ കൊച്ച് ഹൃദയം മടമടാ മിടിക്കും. എല്ലാം ആ വിശാല്‍ജീ ടച്ചോടെ ആസ്വാദിക്കാനും കഴിയും.

പുതുവത്സരത്തിലെ ആദ്യ പോസ്റ്റ് ഒട്ടും മോശമായില്ല.
നവവത്സരാശംസകള്‍...

kichu / കിച്ചു said...

വിശാല്‍.....

നല്ല പോസ്റ്റ്ഷ്ടാ...അഭിനന്ദനങ്ങള്‍ട്ടാ..

ചെറിയ ഒരു മാറ്റം നന്നായി..

കുഞ്ഞു നര്‍മത്താല്‍ ഒരു ചിരിയും... ഗോപിയെട്ടന്റെ ദൈന്യതയാല്‍ കണ്ണീരിന്റ നനവും പടര്‍ത്താനായി.

മുല്ലവള്ളി said...

വിശാലേട്ടാ, നന്നായിട്ടുണ്ട്‌ ട്ടോ...
:)

Ashly said...

Thank God...i was checking ur blog every day....great to see you back. Have a wonderful year ahead.

As usual, great writing. Very touching.

Who told no humor ?
"ആദ്യത്തെ ഒരാഴച കൂട്ടിലിടുന്നതെന്നാണ് ചേച്ചി പറയുക" --> Is the best line.

Sethunath UN said...

വിശാലാ,

വ‌ളരെ നല്ല ഒരു പോസ്റ്റ്. ചിരിയ്ക്കുക എന്നത് മാത്രമല്ലല്ലോ ജീവിതം. ചിരിപ്പിയ്ക്കുക എന്നതു മാത്രമായി വിശാലനും ഒതുങ്ങരുത്. പോരട്ടെ ഇങ്ങനെ...

ചിയേഴ്സ്! :)

ലേഖാവിജയ് said...

ചെറുചിരിയോടെ വായിച്ച് വന്ന കഥ എത്ര വേഗമാണു കണ്ണ് നനയിപ്പിച്ചത്.നന്നായി.പുതുവത്സരാശംസകള്‍ !

Murali K Menon said...

ഒരു ചെയ്ഞ്ചായിട്ടുണ്ട്.. ഇഷ്ടപ്പെട്ടു.

ഭൂമിപുത്രി said...

ഇത്രയും നല്ലൊരു വിശാലമനസ്ക്കനെ പുതുവത്സരത്തില്‍ പരിചയപെടുത്തിത്തന്ന വിശാല്ലമനസ്ക്കനു നവവത്സരാശംസകള്‍!

പി.പി.Somarajan said...

കലക്കീട്ടോ...:)

വിന്‍സ് said...

wow.....not to gopiyettan, but to the old man.

നവരുചിയന്‍ said...

വിശാല്‍ ജി .. നന്നായിരിക്കുന്നു .
കൊടകരയില്‍ ചിരി മാത്രം അല്ല ഉള്ളത് എന്നു പറയുന്നത് നല്ലതാ .. ഇല്ലേല്‍ ഞങ്ങളൊക്കെ വെക്കേഷന്‍ ഇന്‍ കൊടകര എന്നും പറഞ്ഞു ഇറങ്ങിയെനെ

ധനേഷ് said...

എന്റെ തല്ലിപ്പൊളി ബ്ലോഗില്‍ ആകെ ഉള്ള ഹിറ്റ് നേക്കാള്‍ കൂടുതല്‍ ഞാന്‍ തന്നെ ഹിറ്റ്യ കൊടകരപുരാണത്തില്‍ പുതിയ പോസ്റ്റ് കണ്ടപ്പോള്‍ ആദ്യം തന്നെ അടുത്ത് ആരും ഇല്ലെന്നുരപ്പുവരുത്ത്തി ചിരിക്കാന്‍ റെഡി ആയാണ് വായിച്ചു തുടങ്ങിയത് ....
ടോപ്പിക് സീരിയസ് ആണെന്ന് മനസിലായപ്പോള്‍ അല്പം നിരാശ തോന്നിയെന്കിലും അടുത്ത് ആരുമില്ലെന്ന് ഉറപ്പുവരുത്തിയത് നന്നായി എന്ന് പിന്നെ തോന്നി ..
എന്തിനാ നമ്മുടെ കണ്ണ് നിറഞ്ഞിരിക്കുന്നത് നാട്ടുകാര്‍ കാണുന്നെ ...
മാഷേ കലക്കി ട്ടാ....
ഒരൊന്നര കഥ ...
ഇനി ചിരിപ്പിച്ച് കൊല്ലു‌ന്ന ഒരു പോസ്റ്റ് ആയിക്കോട്ടെ..

കാനനവാസന്‍ said...

വിശാല്‍ജി... പുതുവത്സരാശംസകള്‍....
പുതുവര്‍ഷത്തിലെ പുതുശൈലി ഇഷ്ടപ്പെട്ടു...

ബൂലോകത്തില്‍ പുതിയ ആളായതുകൊണ്ട് ,ഞാന്‍ പോസ്റ്റുകളൊക്കെ വായിച്ചുവരുന്നതെയുള്ളൂ.

420 said...

നിനക്കുള്ളതു ഞാന്‍
വച്ചണ്ട്‌ ട്രാ അക്രമീ..
ബാക്കി ഇതു വായിച്ചിട്ടു
പറയാം.

vadavosky said...

-ജീവിതത്തിനും മരണത്തിനും ഇടയില്‍ നില്‍ക്കുമ്പോഴും ഹൃദയത്തില്‍ നന്മയും സത്യവും കാത്തുസൂക്ഷിക്കുന്ന ആ മനുഷ്യന്‍-
ഈ വരികള്‍ വളരെ നന്നായിരിക്കുന്നു

G.MANU said...

കരയിലെ കെട്ടുപ്രായം തികഞ്ഞ ദാവണിയുടുത്ത ഹവ്വകളും, അളിയനായി കിട്ടാന്‍ കൈലിമുണ്ടുടുത്ത് കലുങ്കിലിരുന്നിരുന്ന ആദങ്ങളും റിഹേഴ്സലെടുത്തിരുന്നെന്ന് പറയപ്പെടുന്നു.

വിശാല്‍ ജി, ഞാന്‍ പറയും ഇത്‌ മാഷിന്‍റെ ബെസ്റ്റ്‌ പോസ്റ്റ്‌.. നര്‍മ്മത്തില്‍ ജീവിതം മിക്സ്‌ ചെയ്ത മനോഹരമായ വര്‍ണ്ണന...

ഇതുപോലെയുള്ളവ ഇനിയും വരട്ടേ.....പ്ളീസ്‌.....

നവവര്‍ഷ നവപോസ്റ്റിനു ഹൃദയം നിറഞ്ഞ ആശംസകള്‍.....

Babu Kalyanam said...
This comment has been removed by the author.
Babu Kalyanam said...

lekhavijay പറഞ്ഞതു തന്നെയാ എനിക്കും പറയാനുള്ളതു...
കണ്ണു നിറഞ്ഞു പോയി... :)

ശ്രീ said...

വിശാലേട്ടാ...
വളരെ ഹൃദയസ്പര്‍‌ശിയായി, ഈ വര്‍‌ഷത്തെ ആദ്യ പോസ്റ്റ്.

“ഇനി എനിക്ക് വേണ്ടാ ഈ പണം. എടുത്തോ... നിങ്ങള്‍ തന്നെ എടുത്തോ. മോള്‍ടെ കല്യാണം നടത്തിക്കോളൂ. എനിക്ക് ഈ കാശിനേലും എത്രയോ വലുതാണ് ഇപ്പോള്‍ നിങ്ങള്‍ തിരിച്ച് തന്നത് ! ഇത്രയും പേരുടെ മുന്‍പില്‍ വച്ച് കള്ളനായി മാറുമായിരുന്ന നിരപരാധിയായ എന്നെ നിങ്ങള്‍ രക്ഷിച്ചില്ലേ... എനിക്കത് മതി”

ഗോപ്യേട്ടന്‍ ഒരു നൂറ് ആശംസകള്‍!
:)

മുന്നാസ്. said...

വിശാലമനസ്സേ, നമിച്ചിരിക്കുന്നു.
കൊടകര സുഹ്രുത്തേ തെറ്റിദ്ധരിക്കല്ലേ....താങ്കളെയല്ല,ബസ്സിലെ ആ പാവം വൃദ്ധനെയാ ഉദ്ദേശിച്ചെ.

നന്മ നിറഞ്ഞ പോസ്റ്റ്.ഇഷ്ടമായി.നന്മയും സ്നേഹവും നിറഞ്ഞ കൊടകരക്കാരുടെ കൂടുതല്‍ വിശേഷങ്ങള്‍ക്കായി കാത്തിരിക്കുന്നു.

അരവിന്ദ് :: aravind said...

ലളിതമായ വിവരണം.
വി യെം മുന്നില്‍ വന്നിരുന്നു ലൈംജ്യൂസ് (കോഡ്..കോഡ്) കുടിച്ച് കൊച്ചുവര്‍ത്തമാനം പറഞ്ഞിരിക്കുമ്പോള്‍ പറഞ്ഞ ഒരു കഥ പോലെ.

എന്നാല്‍ ഒന്നു മാറ്റിയെഴുതിയാല്‍ ഒരു ചെറുകഥയാക്കാന്‍ ഉള്ള ത്രെഡ് ഉണ്ട് താനും.
"കോഴിക്കോട് നിന്ന് ഗോപി തൃശൂരിനുള്ള ബസ്സില്‍ കയറിയപ്പോളേക്കും‍ ഉച്ചചൂടില്‍ നഗരം തിളച്ചു തുടങ്ങിയിരുന്നു..." എന്നോ മറ്റോ തുടങ്ങി ആ ഒരു പോക്ക്.

വായിക്കാന്‍ സുഖം ഇദന്ന്യാ:-)

അനിയന്‍കുട്ടി | aniyankutti said...

വിമസ്കൂ... നന്നായിണ്ട്. നവവല്‍സരാശംസകള്‍..!

ഓഫ്:
അരവീ.. വഴി മാറിച്ചിന്തിച്ചു തുടങ്ങ്യോ... ഹിഹി!
മുമ്പ് കവിതയെഴുതിയെഴുതി കിട്ട്യേതൊക്കെ മറന്നോ... ഹൊ. എന്തൂട്ടായിരുന്നു അങ്കം!

അലി said...

വിശാലേട്ടാ...
വെറും പറച്ചിലായില്ല.
ഹൃദ്യമായി.
അഭിനന്ദനങ്ങള്‍!

Vempally|വെമ്പള്ളി said...

വിശാലാ, ഇതിങ്ങനെ തന്നെയാണെഴുതേണ്ടത് - തമാശയായാലും, സെന്റ്റി കാച്ചിയാലും ഗോപ്യേട്ടന്റെ ഫുള്‍ കൊഴുപ്പുള്ള പാലുപോലുള്ള മനസ്സില്‍ കൂടുതല്‍ വെള്ളം ചേര്‍ക്കലാവും.
ഇതു മതീല്ലൊ..

അരവിന്ദാ ഭാവന.. ഭാവന.. ഹൊ.

[ nardnahc hsemus ] said...

ഹൌ.. അന്നാലും അത് ഇച്ചിരി കൂടിപ്പോയിട്ടാ.. ചോരനീരാക്കിയ കാശല്ലെ.. മാക്സിമം ഒരയ്യായിരം മത്യാര്‍ന്നു... ഹിഹി

മാഷെ, ഉഗ്രന്‍!

ഹാപ്പി ന്യൂ ഇയര്‍ !

Unknown said...

വിശാലേട്ടാ,
ഗോപ്യേട്ടന്‍ ആള് പാലുംവെള്ളം തന്നെ സംശയം ഇല്ല. :)

കുട്ടിച്ചാത്തന്‍ said...

ചാത്തനേറ്: വായിച്ച് കഴിഞ്ഞപ്പോള്‍ ഒരു കുളിര് ഡിസംബര്‍ ഇപ്പോള് കഴിഞ്ഞതു കൊണ്ടാവും അല്ലേ?

NITHYAN said...

നന്നായിട്ടുണ്ട്‌. വളരെ വളരെ. ഹാസസാഹിത്യം എന്നു പറഞ്ഞ ഒന്നില്ലെന്നായിരുന്നു സഞ്‌ജയന്റെ കാഴ്‌ച്ചപ്പാട്‌. വായനക്കാരന്റെ നര്‍മ്മബോധത്തെ ആശ്രയിച്ചിരിക്കും ഒരു പരിധിവരെ ഹാസ്യത്തിന്റെ വിജയം.
ഇന്നലെ നിത്യകാമുകിയോടൊപ്പം അലയുമ്പോള്‍ ഒരു പുസ്‌തകക്കടയില്‍ കയറി. അപ്പോള്‍ ബോബനും മോളിയുടെ കവര്‍പേജ്‌ ശ്രദ്ധയില്‍ പെട്ടു. ആ കാര്‍ട്ടൂണ്‍ വായിച്ചതും എനിക്ക്‌ ചിരി നിന്നില്ല. അത്‌ പെട്ടെന്നുതന്നെ പൊട്ടിച്ചിരിയായി.
ഞാന്‍ അത്‌ കാമുകിയെയും ചൂണ്ടിക്കാണിച്ചു. മൂപ്പരങ്ങനെ മുട്ടിയിട്ട തേങ്ങപോലെ നോക്കിനിന്നു കുറേനേരം. പിന്നെ ഒരു പുഞ്ചിരിയില്‍ പ്രകടനം ഒതുക്കി. അതോടെ ചുറ്റും ഈ രംഗത്തിന്‌ സാക്ഷ്യം വഹിച്ചവരൊക്കെ ഒരു മനോരോഗിയുടെ കെട്ടിയോളോടുള്ള എല്ലാ സഹതാപവും പ്രകടിപ്പിച്ചുകൊണ്ട്‌ ദയനീയമായി അവളെ നോക്കിനിന്നു.

Anonymous said...

നന്നായിരിക്കുന്നു.

Pongummoodan said...

കണ്ണുനീരില്‍ ചാലിച്ചു തൊട്ട ചിരിപ്പൊട്ട്‌.

എം.എസ്. രാജ്‌ | M S Raj said...

ഗോപ്യേട്ടന്‍റെ മനസ്സ്‌ വെറും പാലുംവെള്ളമല്ല. നല്ല നറുംപാലു തന്നെ. ഇരിക്കട്ടെ, ഗോപ്യേട്ടനും പാവം കാര്‍ന്നോര്‍ക്കും എന്‍റെ ഒരു സല്യൂട്ട്‌..!

വിശാലേട്ടനു അഭിനന്ദനങ്ങള്‍..!

Dhanya said...

good one.. have a fantastic year ahead :)

Satheesh Haripad said...

വിശാലേട്ടാ...New Year Episode കലക്കി.
ചിരിയുടെ കൂടെ അല്പം ചിന്തയും ആയി. ഇതു പോലെയുള്ള നല്ല മനുഷ്യര്‍ ഇന്നും ഉണ്ടെന്നറിയുന്നതു തന്നെ ഒരു സന്തോഷം.

http://satheeshharipad.blogspot.com/

d said...

വിശാല്‍‌ജി,
ഹൃദയ സ്പര്‍ശിയായ കഥ. വളരെ നന്നായിരിക്കുന്നു.
ഗോപ്യേട്ടനും ബസ്സിലെ പാവം വൃദ്ധനും, രണ്ടു പേരും നന്മ നിറഞ്ഞവര്‍..

പുതു വത്സരാശംസകള്‍!!

ഹരിയണ്ണന്‍@Hariyannan said...

ശരിക്കും വിയര്‍പ്പില്‍കുതിര്‍ന്ന ആ ഇരുപതിനായിരം ഉറുപ്യക്ക് കോടികളുടെ വില!!

സുഗതരാജ് പലേരി said...

വിശാല്‍ജിയുടെ സ്വന്തം ശൈലി. ടെന്‍ഷനടിച്ചുപോയി.

പക്ഷെ അവസാനം ചിരിക്കുപകരം മനസ്സില്‍ ആശ്വാസം, സമാധാനം ഒക്കെച്ചേര്‍ന്നൊരു കുളിര്. കണ്ണും മനസ്സും നിറഞ്ഞു.

അരവിന്ദന്‍ പറഞ്ഞ ലൈനും ഒന്നു പരീക്ഷിക്കാം. അതിനുള്ള സ്കോപ്പുണ്ട്.

ManohaRRan said...

അതിവിനയം വേണ്ട വിശാലമനസ്കാ,

ഹാസ്യം പ്രതീക്ഷിച്ച്‌ മനസ്സിണ്റ്റെ നൈര്‍മല്ല്യം അനുഭവിച്ചവരാണ്‌ മറുകുറിപ്പിട്ടവരൊക്കെയും. ഇനിയും എഴുതൂ, ആ എഴുത്തിണ്റ്റെ ഒഴുക്കോടെ.

കാലമാടന്‍ said...

ഇഷ്ടായി....

ഏറനാടന്‍ said...

ഹ! അപ്പോള്‍ ഇവിടൊക്കെതന്നെയുണ്ടല്ലേ ഏട്ടാ..? ഇക്കഥ ഏട്ടനൊപ്പം ഷാര്‍‌ജാ പോകും വഴി കേട്ടിരുന്നെങ്കിലും രസിച്ചുവായിച്ചൂ. ഇക്കൊല്ലവും നല്ല വിളവെടുപ്പ് ബൂലോഗയിടത്തുണ്ടാവട്ടെ എന്നാശംസിക്കുന്നു...

ഒരു നാടന്‍..

ഉഗാണ്ട രണ്ടാമന്‍ said...

ഒരു വിശാല മനസ്കന്‍ സ്പെഷ്യല്‍...വളരെ നന്നായിരിക്കുന്നു... നന്മ നിറഞ്ഞ പുതുവര്‍ഷം ആശംസിക്കുന്നു.

a r t | m o n k said...

Sajeeva edhu kalakki!

Jayan - Bangalore

കാശിതുമ്പകള്‍ said...

കൊടകരയിലെ വിശാലഗോപ്യേട്ടന്‍ ചുള്ളന്‍!!!

കണ്ണൂസ്‌ said...

:) Masha Allah!

Anonymous said...

中高年 転職アルバイト 求人情報ブライダル転職競馬FXダイエットお見合い競馬 予想新築マンション 新築マンションコンタクトレンズ婚約指輪 合宿免許人材派遣東京都 墓地派遣会社人材派遣パチンコ 攻略おなら货架OCROCR手机词典高速扫描机票灭蟑螂蜗轮减速­机减速机齿轮减速机丝杆升降机租房租房北京租房北京租房搬家公司­北京搬家北京搬家公司上海机票上海机票上海打折机票上海打折机票­上海特价机票上海特价机票搬家公司搬家公司北京搬家公司北京搬家­公司

Kumar Neelakandan © (Kumar NM) said...

കളം പകുതി മാറ്റി ചവിട്ടിയ പോസ്റ്റ് കൊള്ളാം. പക്ഷെ അതിനെ കാളും എനിക്കിഷ്ടമായത് എനിക്കു മുകളില്‍ കിടക്കുന്ന ആ ജപ്പാന്‍ കാരന്റെ കമന്റ് ആണ്. അത് ഒരുപാടു തവണ വായിച്ച് ഞാന്‍ ചിരിച്ച് ചിരിച്ച് കൊടലു പുറത്തുവന്നു. ഈ ജപ്പാന്‍ ചേട്ടന്മാരൊക്കെ ശരിക്കും തമാശക്കാര്‍ തന്നെയാണല്ലേ?

ഷാജുദീന്‍ said...

ഒരു ചെയ്ഞ്ച് എപ്പോഴും നല്ലതാ. ഒത്തിരി നാളുകൂടി വായിക്കാന്‍ വന്നപ്പോ നല്ലതു തന്നെ വിരലില്‍ തടഞ്ഞു

Eccentric said...

വിശാലെട്ടാ, വളരെ നല്ല പോസ്റ്റ്. കഴിഞ്ഞ കുറെ നാളായി എവിടാരുന്നു? 'മകനെ മടങ്ങി വരൂ' സ്റ്റൈലില്‍ ഒരു പരസ്യം കൊടുക്കാന്‍ എല്ലാരും പ്ലാന്‍ ഇടുകയായിരുന്നു.

IVY said...

കന്റുകളുടെ മഹാപ്രവാഹത്തിലേക്ക് ഒന്നുകൂടി..മറ്റു പോസ്റ്റുകളിലെപ്പോലെ ഒരു നര്‍മ്മം നിറഞ്ഞ ക്ലൈമാക്സ് കാത്തിരിക്കുമ്പോഴാണ് അപ്രതീക്ഷിതമായ ഈ ട്വിസ്റ്റ്..ഹൃദയസ്പര്‍ശിയായി..അഭിനന്ദനങ്ങള്‍

ചമ്പക്കാടന്‍ said...

വിശാല്‍ജീ,
വായനക്കാരന്റെ മനസ്സറിയുന്ന എഴുത്ത്. ഈ ഫിനിഷിങ് ഉഗ്രന്‍. ഇങ്ങനെ ഒരിക്കലെങ്കിലും സംശയത്തിന്റെ നിഴലില്‍ അറിയാതെ പെട്ടുപോകുന്നതായി ഓര്‍ത്ത് നടുങ്ങാത്ത ( സ്വപ^നത്തില്‍) ആരാ ഉള്ളത്. നന്മയുടെ പ്രതീകമായി ആ വയസ്സനെ അവതരിപ്പിച്ച് അവസാനം അസ്സലാക്കി. അഭിനന്ദനങ്ങള്‍.

Anonymous said...

നമ്മള്‍ ബൂലോഗത്തില്‍ താരതമ്യേന പുതുതാണേ..! ബൂലോഗത്തിന്റെ കിരീടം വയ്ക്കാത്ത ചക്രവര്ത്തിയോട് നന്നായി എന്നു പറയുന്നതില്‍ കാര്യമില്ലല്ലോ..! എങ്കിലും ഈ പോസ്റ്റ് ഒത്തിരി ഇഷ്ടമായി. അതിലെ നന്മ കൊണ്ടു തന്നെ.

കനല്‍ said...

യഥാര്‍ത്ഥ സത്യം മനസിലാക്കാതെ നിരപരാധിയായ ഒരു മനുഷ്യനെ അപകീര്‍ത്തിപ്പെടുത്തി ഉത്തരാവാദിത്ത്വത്തില്‍ കരകയറാന്‍ ശ്രമിക്കുന്ന നീതിപാലകര്‍, സമൂഹം
സത്യം തന്റെ ഭാഗത്താണെങ്കിലും അത് സംരക്ഷിക്കപെടാനുള്ള സാധ്യത നഷ്ടപെടുമൊ ? എന്നുള്ള ഭയം എല്ലാം കുഴപ്പത്തിനും കാരണമാവുന്ന അവസ്ഥയിലെത്തുന്ന കഥാപാത്രം, സംഭവങ്ങളിലെ സ്വഭാവികത, വിശാലന്റെ വേറിട്ടൊരു പോസ്റ്റ് ഹ്യദയസ്പര്‍ശി തന്നെ

ജോഷി രവി said...

nannaayittundu...

Anonymous said...

എല്ലാ നന്‍മകളും നേരുന്നു... Nothing else...

Visala Manaskan said...

നന്മയുള്ള രണ്ട് മനുഷ്യരുടെ കഥക്ക് നല്‍കിയ സ്വീകരണത്തിന്, അതെഴുതിയ ആളെന്ന നിലക്ക് എന്റെ സന്തോഷം അറിയിക്കുന്നു. എല്ലാവരോടും.
-----
വാല്‍മീകി -:) അഭിപ്രായത്തിന് നന്ദി ഡിയര്‍

unni -:) അതെ, അദ്ദേഹം ആണ് റിയല്‍ അദ്ദേഹം!

ശെഫി -:) നന്ദി. എഴുതി വരുമ്പോള്‍ തമാശ ആവുമോന്നറിയില്ല, എങ്കിലും സങ്കടം ഐറ്റംസ് ഇവിടെ എഴുതണ പ്രശ്നം ഇല്ല.

tk sujith -:) വളരെ സന്തോഷം സുജിത്തേ... സുജിത്തിനുപോലും ഇത് ഇഷ്ടാവുന്നു എന്നറിയുമ്പോള്‍!

പപ്പൂസ് -:) ഹഹഹ കൊടകരയില്‍ ഞാനറിയാത്ത ആ ഉറവ ഏത്? പിന്നെ, പപ്പൂസ് ആരാ?? എന്ന് എന്നോട് ഇന്നലേം കൂടെ ബ്ലോഗിലെ ഒരു സിംഹം ചോദിച്ചിരുന്നു. സത്യായിട്ടും എനിക്കറിയില്ലെന്ന് ഞാനും പറഞ്ഞു. ഹവ്വെവര്‍, വീരഗാഥ അടുത്ത് വായിച്ചതിലേറ്റവും ഇഷ്ടപ്പെട്ട ഒരു പോസ്റ്റാട്ടാ.. ഹാപ്പി 2008 തിരിച്ചും!

ആഗ്നേയ -:) ആയുഷ്വുമണ്‍ ഭവ: താങ്ക്സ്!

കൃഷ്‌ | krish -:) വളരെ വളരെ സന്തോഷം. വീണ്ടും എഴുതാന്‍ തോന്നിക്കുന്ന ഈ സപ്പോര്‍ട്ടിന്.

കാവലാന്‍ -:) നന്ദികള്‍

kaithamullu : കൈതമുള്ള് -:) ഉം ഉം... അതെയതെ. തോട്ടുവക്കത്ത് കൂടെ പോകുമ്പോള്‍ കൈതമുള്ള് സാരിയിലേ പിടിക്കൂ എന്നത് എത്ര സത്യം!

അഞ്ചല്‍ക്കാരന്‍ -:) വാരവിശേഷക്കാരാ... നന്ദി. സന്തോഷം.

kichu -:) താങ്ക്സ് ട്ടാ

മുല്ലവള്ളി -:) അടിപൊളി പേര്‍! സന്തോഷം.

Ashly A K -:) കഴിഞ്ഞ പൊസ്റ്റില്‍ ഒരു വായനക്കാരന്‍ അഭിപ്രായപ്പെട്ടതുപോലെ, യാതൊരു തരത്തിലുള്ള ഭാഷാശുദ്ധിയോ മെസേജോ ഇന്‍ഫോര്‍മേഷനോ ഇല്ലാതെ എന്റെ ചില തോന്നലുകള്‍ ആര്‍ക്ക് വേണ്ടി എഴുതുന്നൂ എന്ന ചോദ്യം ഇടക്കിടെ ഞാന്‍ ചോദിക്കാറുണ്ട്. സത്യത്തില്‍ എനിക്ക് വേണ്ടി തന്നെ എന്നാണ് ഉത്തരം കിട്ടാറ്. എങ്കിലും ചിലര്‍, ആഷ്ലിയെപോലെ വളരെ കുറച്ച് ചിലര്‍ക്ക് നമ്മുടെ ഭാഷയും രീതിയും ഇപ്പറഞ്ഞ സംഗതികള്‍ ഒന്നും ഇല്ലെങ്കിലും വളരെ ഇഷ്ടമാണ് എന്നത് ഭയങ്കര സന്തൊഷമുള്ള കാര്യമാണ് കേട്ടോ.

നിഷ്ക്കളങ്കന്‍ -:) താങ്ക്സ് മച്ചൂ. അതേ..ചിയേഴ്സ്! :)

lekhavijay -:) താങ്ക്സ്

മുരളി മേനോന്‍ (Murali Menon) -:) ഉം.. ഇഷ്ടപ്പെട്ടില്ലെങ്കില്‍ മാപ്രാണം ഞാന്‍ ബോംബിടും!!!

ഭൂമിപുത്രി -:) താങ്ക്സ്

പി.പി.Somarajan -:) ശുക്കിരിയ

വിന്‍സ് -:) നന്ദി ചുള്ളാ

നവരുചിയന്‍ -:) സന്തൊഷം ഡിയര്‍

Dhanesh -:) ധനേഷിന്റെ ബ്ലോഗ് തല്ലിപ്പൊളിയാണെന്നാരു പറഞ്ഞു? അങ്ങിനെയൊന്നും പറയരുത് കൂട്ടുകാരാ.

കാനനവാസന്‍ -:) സന്തോഷം

വി.ആര്‍. ഹരിപ്രസാദ്‌. -:) അക്രമായിരാ.. ഞാന്‍ ജോസേട്ടനോട് പറഞ്ഞിരുന്നു. പക്ഷെ, നമ്പര്‍...എന്റെ കയ്യിലുണ്ടായിരുന്നില്ല ഡാ. സോറി ഡാ. :((

vadavosky -:) വളരെ സന്തോഷം.

G.manu -:) പ്രിയ മനു, ബ്ലോഗില്‍ പലരും വന്നു എഴുതി തകര്‍ത്തു. എങ്കിലും മനുവിന്റെ ചില കാച്ചലിന്റെ റേയ്ഞ്ച്.. അതിത്തിരി അക്രമം തന്നെ. ഇപ്പോള്‍ ഞാന്‍ ഏറ്റവും കൂടുതല്‍ ചിരിക്കുന്നത് മനുവിന്റെ ബ്ലോഗ് വായിച്ചാണ്. 916 തമാശകള്‍! ബ്ലോഗേഴ്സിന്റെ ഒരു ഭാഗ്യം.

Babu Kalyanam -:) സന്തോഷം ബാബുജീ.

ശ്രീ -:) ശ്രീ ബ്ലോഗിലെ മറ്റൊരു കലേഷാണ്. എഴുത്തുകാരോട് കാണിക്കുന്ന ഈ സ്‌നേഹത്തിന് എന്റെ വക ഒരു സല്യൂട്ട്. താങ്ക്സ്!

Munnas -:) സന്തോഷം.

അരവിന്ദ് :: aravind -:) താങ്ക്സ്. ഒരു ഓണ്‍ റ്റോപ്പിക്ക്: അരവിന്ദ് പുതിയ കഥകള്‍ പോസ്റ്റാതിരിക്കുന്നത് കൊടും പാപവും ചതിയുമാണ്. ഇടക്ക് വച്ച് ഷൂട്ടിങ്ങ് മുടങ്ങി പോയ ‘മഹാപാപി‘ ഉടന്‍ പോസ്റ്റ് ചെയ്തില്ലേങ്കില്‍ ഞാന്‍ ശപിക്കും! :)

അനിയന്‍കുട്ടി -:) താങ്ക്സ് ചുള്ളന്‍!

അലി -:) താങ്ക്സ്ട്ടാ.

Vempally|വെമ്പള്ളി -:) ഹലോ പ്രിയന്‍. ദെവിടേ? താങ്ക്സ് ട്ടാ.

സുമേഷ് ചന്ദ്രന്‍ -:) നന്ദി ഗഡീ.

ദില്‍ബാസുരന്‍ -:) ദില്‍ബാ ആ ഡാ..

കുട്ടിച്ചാത്തന്‍ -:) ഹഹഹ.. അതെ അതെ.

നിത്യന്‍ -:) നന്ദി ഡിയര്‍. ഉം. അത് കലക്കി!

അനില്‍ -:) സന്തോഷം.

പോങ്ങുമ്മൂടന്‍ -:) നന്ദി ചുള്ളന്‍. ഓര്‍ക്കുട്ട് അവസാനിപ്പിച്ചല്ലേ? എന്നിട്ട് എനിക്കിട്ട് പാര വക്കുന്നോ?? :))

രാജ്‌ -:) താങ്ക്സ്.

Dhanya -:) താങ്ക്സ്.

Satheesh Haripad -:) താങ്ക്സ്.

..വീണ.. -:) താങ്ക്സ്.

ഹരിയണ്ണന്‍@Hariyannan -:) താങ്ക്സ്.

സുഗതരാജ് പലേരി -:) താങ്ക്സ്. ഹലോണ്‍ കുറെ ആയല്ലോ കണ്ടിട്ട്?

ManohaRRan-:) താങ്ക്സ്. അതിവിനയം ഒന്നും അല്ല. എന്നാലും ഒരു ഇത്. ത്രെ ഉള്ളൂ. നല്ല പുസ്ത്കങ്ങള്‍ വായിക്കുമ്പോള്‍, ഒരു ചമ്മല്‍.

കാലമാടന്‍ -:) താങ്ക്സ്.

ഏറനാടന്‍ -:) താങ്ക്സ്. ഇല്ല തിരിച്ചെത്തി ഏറ നടാ. :)

ഉഗാണ്ട രണ്ടാമന്‍ -:) താങ്ക്സ്.(നല്ല വെടിച്ചില്ല് പേര്‍ ട്ടാ.)

a r t | m o n k -:) മൂന്നുമുറിക്കാരാ നന്ദി. മെയില്‍ അയക്കാം ട്ടാ.

കാശിതുമ്പകള്‍ -:) താങ്ക്സ്.

കണ്ണൂസ്‌ -:) വായിച്ചതറിഞ്ഞ് സന്തോഷം. താങ്ക്സ്.

Anonymous -:) 词典高速扫描机票 (സോണി കമ്പനിയില്‍ നിന്ന് ഒറിജിനല്‍ ഒരു ടേപ്പ് റെക്കോഡര്‍ വാങ്ങി അയച്ചു തരാമോ? എന്ന് ചോദിച്ചതാ. കട്:മാള, സന്ദേശം)

kumar © -:) നന്ദി മാഷെ. അതെയതെ, ലങ്ങേര്‍ നമ്മുടെ വക്കാരിയുടെ ജപ്പാനിലെ എക്സ് ബൊസാത്രേ!!

ഷാജുദീന്‍ -:) താങ്ക്സ്.

Eccentric -:) താങ്ക്സ്.

വിനീതവിധേയന്‍ -:) താങ്ക്സ്.

ചമ്പക്കാടന്‍ -:) താങ്ക്സ്.

അദൃശ്യന്‍ -:) താങ്ക്സ്.

കനല്‍ -:) താങ്ക്സ്.

purakkadan -:) താങ്ക്സ്.

ബലിതവിചാരം -:) താങ്ക്സ്.

Aluvavala said...

ശൈലി കലക്കി അളിയാ. നന്നായി

ഹരിക്രിഷ്ണന്‍ നിരണം said...

വളരെ നന്നായി സുഹ്രുതെ

ഹരിക്രിഷ്ണന്‍ നിരണം said...

അടിപൊളി

ഹരിക്രിഷ്ണന്‍ നിരണം said...

നന്നായി മാകനെ നന്നായി......... മൊനു നല്ല്തു വരും.... കഴിഞ്ഞ് മാസം മൊനും കുറ്ചു മുരിങാക്ക കഴിച്ചലൊ......

Roby said...

നന്നായെന്നൊരു വാക്കു പറയാതെ പോകാന്‍ തോന്നുന്നില്ല.
വളരെ നന്നായി...

എന്നെ കരയിപ്പിച്ചു ഇത്

Visala Manaskan said...

ആലുവവാല > :) താങ്ക്സ്. ഓ.ടോ. ആലുവാല എന്നായിരുന്നേ വിളിക്കാന്‍ കുറച്ചൂങ്കൂടെ എയിമുണ്ടായേനേ.. :)

ഉമാസുധന്‍ > :) സന്തോഷം..

ഹരികൃഷ്ണന്‍ > :) ഹഹഹ...ഉം ഉം ഗൊച്ചുഗള്ളന്‍!

റോബി > :) സന്തോഷായി റോബ്യേട്ടാ... (സന്തോഷായി ഗോപ്യേട്ടാ.. എന്നൊരു നാട്ടുനടപ്പ് ഡയലോഗ് ഉണ്ട്. അതേ ട്യൂണില്‍!)

സാക്ഷരന്‍ said...

“എനിക്ക് വേണ്ടാ ഈ പണം. എടുത്തോ... നിങ്ങള് തന്നെ എടുത്തോ. മോള്ടെ കല്യാണം നടത്തിക്കോളൂ. ഈ കാശിനേലും എത്രയോ വലുതാണ് ഇപ്പോള് നിങ്ങള് തിരിച്ച് തന്നതെന്നറിയോ?? ! ഇത്രയും പേരുടെ മുന്പില് വച്ച് കള്ളനായി മാറുമായിരുന്ന നിരപരാധിയായ എന്നെ നിങ്ങള് രക്ഷിച്ചില്ലേ... എനിക്കത് മതി“

വിശല്ജീ .. 2008 ല് അല്പം സീരിയസ്സാകന് തീരുമാനിച്ചപോലെ …?
നല്ല വിവരണം …
തമാശയല്ലേ നല്ലത്…

Anonymous said...

Heart touching. I feel, to see that old man. There are few more good people remaining in this earth.
Visalamanaskan, Your style is very good. Expecting more in 2008

പ്രയാസി said...

"ഗോപ്യേട്ടന്‍ തലയുയര്‍ത്തി നോക്കി. ജീവിതത്തിനും മരണത്തിനും ഇടയില്‍ നില്‍ക്കുമ്പോഴും ഹൃദയത്തില്‍ നന്മയും സത്യവും കാത്തുസൂക്ഷിക്കുന്ന ആ മനുഷ്യന്‍ ‘ഇത് നൂറിന്റെ നോട്ടൂകളാണ്. ഇതെന്റെ കാശല്ല!’ എന്ന് വീണ്ടും പറഞ്ഞ് നോട്ടുകെട്ടുകള്‍ ഗോപ്യേട്ടന്റെ നേരെ നീട്ടീ."

വിശാല്‍ജി..ഇവിടെയെത്തിയപ്പോള്‍ സത്യമായിട്ടും ഒരു കുളിരു കോരി..!

ഈ പോസ്റ്റ് കണ്ടതിന്റന്നു എന്റെ സിസ്റ്റത്തിനു കുരു..!:(

അതോണ്ടു കമന്റാന്‍ പറ്റീല്ലാ...

ഓര്‍ത്തു വന്നപ്പോള്‍ സെഞ്ച്വറിയടിക്കാറുമായി..

തലേന്നു തുണിമാറ്റൂലാന്നു വാശിയിലാ അല്ലെ..!?

അതിനൊരു മരുന്നു നുമ്മ നുമ്മട പോസ്റ്റില്‍ ചെയ്തിട്ടുണ്ട്..:)

Jayarajan said...

വിശാല്‍ജീ, അവസാനമായപ്പോഴേക്കും കണ്ണ്‍ നനഞ്ഞു പോയി. നന്ദി, രണ്ട്‌ വിശാലമനസ്കരെ പരിചയപ്പെടുത്തിത്തന്നതിന്‌. നന്മ ഹൃദയത്തില്‍ സൂക്ഷിക്കുന്നവരെ അറിയുന്നതും പരിചയപ്പെടുന്നതും മനസ്സിനെ തണുപ്പിക്കുന്നു :)

മുസാഫിര്‍ said...

വിശാല്‍ജി,

ഇങ്ങനെ കുറച്ച് നല്ല മനുഷ്യര്‍ ഇപ്പോഴും ഭൂലോകത്തുള്ളതു കൊണ്ടാണ് അങ്ങേര് ഇതിന്റെ കട്ടേം പടോം മടക്കാത്തത് എന്നു തോന്നുന്നു.ഇഷ്ടമായി.

Visala Manaskan said...

സാക്ഷരന്‍ >:) 2008 ല് അല്പം സീരിയസ്സാകന് തീരുമാനിച്ചപോലെ …? ഒരിക്കലും ഇല്ല ചുള്ളാ! സീരിയസായിട്ടുള്ള കേസില്ല. പിന്നെ പാറ്റണ്‍ ടാങ്ക്.. തകര്‍ത്ത് തരിപ്പണമാക്കി ട്ടാ. അമറന്‍ പോസ്റ്റ്!


raki >:)വായിച്ചതിനും അഭിപ്രായം പറഞ്ഞേനും സന്തോഷമുണ്ട്.


പ്രയാസി >:) താങ്ക്സ് ചൂള്ളന്‍. തലേന്ന് തുണി മാറ്റിയാല്‍ പിന്നെ മെലാല്‍ പുരാണം വായിക്കില്ലാന്ന് വരെ പറയുന്നു ചിലര്‍. എന്ത് ചെയ്യും? :)

Jayarajan >:) വളരെ സന്തോഷം.

മുസാഫിര്‍ >:) ഇപ്പോള്‍ ദുബായിലോ അതോ കുവൈറ്റിലോ? അന്ന് ഫ്ലൈറ്റീന്ന് വിളിച്ചതിന് ശേഷം നമ്മള്‍ മിണ്ടിയിട്ടില്ല ല്ലേ? പ്രോത്സാഹനത്തിന് താങ്ക്സ് ട്ടാ.

ഉപാസന || Upasana said...

വിശാല്‍ ഭായിയുടെ സീരിയസ് കഥ നന്നായി.
ഗോപ്യേട്ടനെപ്പോലെ അധികം പേര്‍ ഇല്ല.

പിന്നെ അരവിന്ദ് ഭായ്യും സുഗതരാജ് ഭായിയും പറഞ്ഞതിന് താഴെ ഒരൊപ്പ് കൂടെ.
ആദ്യത്തെ കോമഡി ലൈന്‍സ് നീക്കിയാല്‍ നല്ല ഒരു ചെറുകഥയാക്കാം.
:)
ഉപാസന

ഓ. ടോ: ജാപ്പാനീസ് കമന്റ് വക്കാരിയുടെ ആയിരിക്കും.ല്ലേ..?. യെന്തൂട്ടാ ഇഷ്ടന്‍ പറഞ്ഞേന്ന്..?

താരാപഥം said...

വിശാല്‍ജീ,
ഇനീംണ്ടാ ഇതുപോലത്തെ ഉരുപ്പടികള്‌ കൊടകരേല്‌. നാട്‌ നന്നാവാന്‍ എങ്ങോട്ടും പോകണ്ട എന്ന് പറയാലോ.. ബിവരേജ്‌ കോര്‍പ്പറേഷന്റെ മുന്‍പില്‍ പോലും ഇത്ര നല്ല മന്‌ഷ്യന്മാരെ കാണാന്‍ കിട്ടില്ല.

The Admirer said...

വിശാല്‍ജി,

പുതുവര്‍ഷത്തില്‍ ചുവടൊന്നു മാറ്റി പിടിച്ചതാണോ. ഈ ജഗദീഷ്‌ ഒക്കെ പണ്ടു പറയുന്ന പോലെ ഞാന്‍ ഇനി സീരിയസ്‌ ചിത്രങ്ങളില്‍ കൂടുതല്‍ അഭിനയിക്കും. തമാശ തല്‍ക്കാലം മതിയാക്കുന്നു. അതു പോലെ അല്ലല്ലോ അല്ലെ. ഹാസ്യം അല്‍പം കുറഞ്ഞാലും പോസ്റ്റ്‌ അടിപൊളിയായി മാഷെ. കൂടുതല്‍ പോസ്റ്റുകള്‍ക്കായി കാത്തിരിക്കുന്നു.

Sharu (Ansha Muneer) said...

എന്തായാലും ശുഭാന്ത്യം ആണല്ലൊ... നല്ല ശൈലി... ആശംസകള്‍

ചുള്ളിക്കാലെ ബാബു said...

‘സംശയത്തിന്റെ പേരില്‍ തന്റെ കാശൊന്നും ഇവിടെ ആരും തട്ടിപ്പറക്കില്ല. താന്‍ റ്റെന്‍ഷന്‍ അടിക്കണ്ട!’ എന്ന് പറയുമെന്ന് പ്രതീക്ഷിച്ച ഗോപ്യേട്ടനോട്

‘ഫ! നായിന്റെ മോനേ... നീ വണ്ടിയില്‍ നിന്ന് ഇറങ്ങിയത് കണ്ടപ്പോള്‍ തന്നെ ഞങ്ങള്‍ക്ക് മനസ്സിലായി, നീ തന്നെയാണ് കാശ് അടിച്ചതെന്ന്. എന്നിട്ട് നീ മുന്‍ കൂറ് ജാമ്യമെടുക്കുന്നോടാ പട്ടീ!!” എന്ന് പറഞ്ഞ് ഗോപ്യേട്ടന്റെ ഷര്‍ട്ടിന്റെ കോളറില്‍ പിടിച്ച് വലിച്ച് സൈഡിലേക്ക് മാറ്റിയങ്ങ് നിര്‍ത്തി.

കേരള പോലീസ് കീ ജയ്!

ചുള്ളിക്കാലെ ബാബു said...

നൂറടിച്ചു!!!!!!!!!!

asdfasdf asfdasdf said...

വിശാലാ ഈ ഗോപ്യേട്ടനെ ഞാനിങ്ങെടുത്തു.

Anonymous said...

KATHIRIKYAYIRUNNU...
SANTHOSHANDU,...ISHTAYI OTHIRI OTHIRI.
NANMAYULLA MANASSUKALKU KSHAMAMILLENNU MANASSILAYI.

SunojVarkey said...

അവസാനം ഒരു ചിരിക്കുള്ള വക പ്രതീക്ഷിച്ചു. പക്ഷെ നിരാശയില്ല. വളരെ നന്നായിരിക്കുന്നു.

Anonymous said...

നമുക്കൊക്കെ ചിലപ്പോള്‍ പറ്റണ പറ്റുതന്നെ... നന്നായി, വിശാലോ!

സസ്നേഹം,
ബെന്നി

പാവം ഞാന്‍!!! said...

സജീവേട്ടന്‍,
പുത്യേ പോസ്റ്റ്‌ ഇഷ്ടായീ....ഇപ്പഴും ഈ ഭൂമിമലയാളത്തില്‌ നന്‍മ മരിച്ചിട്ടില്ലാ-ന്ന് തെളിയിക്കുന്ന നല്ലൊരു പോസ്റ്റ്‌...

വേണു venu said...

‘കാര്‍ന്നോരേ.. ഇത് ഒന്ന് എണ്ണി നോക്ക്യേ.. കറക്റ്റല്ലേന്ന്! ഇല്ലെങ്കില്‍ ഇവന് രണ്ടെണ്ണം കൊടുത്താല്‍ ബാക്കി കൂടെ എടുപ്പിക്കാം’ എന്ന് പറഞ്ഞ്, ഗോപ്യേട്ടന്റെ കയ്യില്‍ നിന്ന് വലിച്ച് വാങ്ങിയ പൈസ വൃദ്ധന്‌ കൊടുക്കുമ്പോള്‍ ഇത്രേം പേരുടെ മുന്‍പില്‍ കള്ളനായ ആ അപമാന ഭാരത്തില്‍, ചങ്കില്‍ നിന്ന് ചോര പൊടിഞ്ഞു ഗോപ്യേട്ടന്‍ രണ്ടുകൈയും തലയില്‍ വച്ച്, നില്‍ക്കാന്‍ ശേഷിയില്ലാതെ താഴെ നിലത്ത് കുനിഞ്ഞങ്ങ് ഇരുന്ന് പോയി.

ഇതു ‍തമാശയല്ല.
ഇതു പച്ച ജീവിതം.
നിരപരാധി ശിക്ഷിക്കപ്പെടുന്ന ഒരു കുഞ്ഞു രംഗം മനോഹരമായി പറഞ്ഞിരിക്കുന്നു വിശാലന്‍‍.
ഒരു പക്ഷേ നൂറിന്‍റെ നോട്ടുകളിലും ആ വൃദ്ധനു് മനം മാറ്റമില്ലായിരുന്നെങ്കില്‍.
ഗോപ്യേട്ടനു് പണം ഉണ്ടായിരുന്നതു കൊണ്ട് ഇങ്ങനെ പറയാന്‍ സാധിച്ചു. ഈ പൈസാ എടുത്തോളൂ .. എന്‍റെ അഭിമാനം രക്ഷിച്ചില്ലേ. സ്വന്തം മകളുടെ അഡ്മിഷ്ഹനോ, കല്യാണത്തിനോ തുരുക്കൂട്ടിയ പണവുമായി പോകുന്ന ഒരു പാവപ്പെട്ടവനായിരുന്നെങ്കിലോ ഗോപിയേട്ടന്‍.?
ഈ രചന എനിക്കൊത്തിരി ഇഷ്ടമായി, ഇതു ജീവിതത്തിന്‍റെ നിസ്സഹായത വിളിച്ചു കൂകുന്നു. ഇനിയും നല്ല നല്ല കഥകള്‍ ജനിക്കട്ടെ. ഞങ്ങള്‍ക്ക് വായിച്ചസ്വദിക്കാന്‍ അവസരം ഉണ്ടാകട്ടെ.:ആശംസകള്‍.)

Anonymous said...

ലേറ്റായാലും ലേറ്റസ്റ്റായി വന്ന വിശാലേട്ടാ


ഏരുമപ്പാലു പോലുള്ള (വെള്ളം ചേര്‍ത്തതല്ല) പോസ്റ്റിട്ടതിന്

എന്റെ വക കിടക്കട്ടെ ഒരു comment

Buty meets Quality

സ്വന്തം
സുഗേഷ്

Rafeeq said...

ഗോപിയെട്ടന്റെ മനസ്സു വിശാല മനസ്ക്കനെ പോലെ തെന്നെ വിശാലം..

ഞാന്‍ വായിക്ക്കാന്‍ ഇച്ചിരി ലേറ്റ്‌ ആയൊ എന്നൊരു സംശയം.. ;-(

Anonymous said...

വായിക്കാന്‍ ലേറ്റ് ആയി !

വിശാല്‍ജി കലക്കി.... ഒരു നല്ല മനുഷ്യനെ, അല്ല രണ്ടു നല്ല മനുഷ്യരെ പരിചയപ്പെടുത്തിയതിനു നന്ദി !

ഗീത said...

മനസ്സും കണ്ണും നിറയിച്ച പോസ്റ്റ്.

പണത്തിനേക്കാളും അഭിമാനം തന്നെയാണ് വലുത്, അല്ലേ?
ഞാനിവിടെ ആദ്യമാണ്..
എങ്കിലും, കൊടകരപുരാണം എന്നു് ഇതിനു മുന്‍പ് കേട്ടിട്ടുണ്ട്......
അതിവിടെയാണെന്ന് ഇന്നാണ് അറിയുന്നത്.

ഈ സംഭവം നടന്നതുതന്നെയോ?

Cartoonist said...

വിശാലാക്ഷീ,
ഇരുപതിനായിരം ഉര്‍പ്യേടെ ഹാസ്യം ശരിയ്ക്കാസ്വദിച്ചു, പ്രത്യേകിച്ച് ആ ആദ്യ നിമിഷങ്ങളില്‍. എങ്കിലും, മൊത്തം ഇഫ്ഫെക്ടില്‍ ഒരു നൂറ് രൂവേടെ കൊറവ്ണ്ട്. അടുത്ത തവണ പരിഹരിക്കുമല്ലൊ.
ഉദ്വേഗപൂര്‍വം,
ഉദാസീനന്‍

Cartoonist said...
This comment has been removed by the author.
Anonymous said...

CHULLA
ITHU ORU SANMARGAMKADHAYAYI POYI
ITHRAMATHRAM


PRADEEP SHJ

Unknown said...

കലക്കി മാഷേ,പതിവു ശൈലിയില്‍ നിന്നും മാറിയെങ്കിലും വളരെ touching ആയ climax..

superb!!!

rajan said...

...mumbenno vayich Basherinte Daya enna katha pole athi manoharam

ഹരിക്രിഷ്ണന്‍ നിരണം said...

vishala ningalude favorate song http://www.youtube.com/watch?v=EP7JsGVfUu0

Anonymous said...

its very good man

I like it

Anonymous said...

മാഷെ കൊള്ളാം കെട്ടൊ……….


Me new to Malayalam blogs.., read almost all ur stories in 2 days…………….ADIPOLEeeee…

Struggling to type n malyalam….

Nalla onnamthram malayali thaneya , pakshe Malayalam typing angotu vazhangunnilla…..namukku readiyakkam…………..

bbb said...

മാഷെ കൊള്ളാം കെട്ടൊ……….


Me new to Malayalam blogs.., read almost all ur stories in 2 days…………….ADIPOLEeeee…

Struggling to type n malyalam….

Nalla onnamthram malayali thaneya , pakshe Malayalam typing angotu vazhangunnilla…..namukku readiyakkam…………..

Anonymous said...

Vishaal jee,

Kidilan story... Dakshina vachu irunnotte ?? Vettila courier il ayakkaam..

Kuttoos.

കൃഷ്ണപ്രിയ. said...

ഇനി ഗോപ്യേട്ടന്‍ നാട്ടില്‍ വരുമ്പോള്‍ ഒന്നറിയിക്കണേ വിശാലേട്ടോ.. :)

kribhconagaram said...

good narration and touching...

Anonymous said...

മനോഹരമായ വായനാനുഭവം
പുസ്തകമാകാന്‍ പോകുന്ന ഈബ്ലൊഗിനു എന്‍റെ നിസ്സാരമായ വിലയിരുത്തല്‍ അവശ്യമില്ലല്ലോ.
എങ്കിലും ഇതെഴുതാതെ പോകാന്‍ മനസ്സു വരുന്നില്ല

അരവിന്ദ് :: aravind said...

വിശാലേട്ടാ
കുറേ നേരായി ഇവടെ വന്ന് നോക്കണൂ...
നമ്പൂരി മാഷടെ ക്ലാസ്സ് വിട്ട് റോസി വരുന്നുണ്ടോന്നറിയാന്‍ തിരുവല്ല നമ്പൂരീസ് പാരലലിന്റെ മുന്നില്‍ ഇടക്കിടെ ചെന്ന് നോക്കി തിരിച്ച് ട്റാന്‍‌സ്പോര്‍ട്ട് സ്റ്റാന്‍ഡില്‍ പോയി ഇരുന്നത് പോലെ കുറേ നേരായി...
ഇതെവ്‌ടെ പോയി കെടക്കാണ്? മര്യാദക്ക് പോസ്റ്റിടണണ്ടോ...പറഞ്ഞ് പറ്റിക്ക്യാ?
രാവിലെ തൊടങ്ങീതാ പുരാണം റീഫ്രെഷ് പരിപാടി!
ഒന്നിട് വി യെം..അത്ര ഭംഗി മതീന്ന്.

Anonymous said...

ഹായ് വിശാകമനസ്കന്‍... സത്യം പറഞ്ഞാ‍ല്‍ അവസാനം വായിച്ചപ്പൊളാ ശ്വാസം നേരെ വീണത്.. ഗോപ്യേട്ടനെ കള്ളന്‍ ആക്കിയിരുന്നെങ്കില്‍ ഞാന്‍ ക്ഷമിക്കില്ലയിരുന്നു... പലപ്പോളും രൂപയല്ലല്ലൊ വലുത് അതിനേക്കാള്‍ വിലപ്പെട്ടതല്ലെ അഭിമാനം...

വിദേശി said...

great........

Anonymous said...

Nannayittundu vishallll ....

jense said...

പതിവില്‍ നിന്നും വെത്യസ്തമായി മനസ്സില്‍ തട്ടുന്ന ഒരു നല്ല വിവരണം.... നന്നായിരിക്കുന്നു...

ഗുരുജി said...

ആദ്യമായിട്ടാണ്‌ ഒരു കമന്റ് ഇടുന്നത്. അതിനുള്ള യോഗ്യത ഉണ്ടോ എന്നുപോലുമറിയില്ല. ഇതു വായിച്ചപ്പോള്‍ എന്തെങ്കിലും ഒന്നെഴുതാതെ പോകാന്‍ തോന്നുന്നില്ല. എല്ലാം നഷ്ടപെട്ടു നില്‍ക്കുമ്പോഴും, പെട്ടെന്നു തിരിച്ചുകിട്ടിയ സന്തോഷത്തിലും സത്യം മാത്രം പറഞ്ഞ ആ വൃദ്ധന്റെ മനസ്സിലോ, മാനം രക്ഷിച്ചതിന്റെ പേരില്‍ ആ പൈസ അപ്പാടെ തിരികെ നല്‍കിയ ഗോപ്യേട്ടന്റെ മനസ്സിലോ കൂടുതല്‍ നന്‍മ? ഇത്തരക്കാരൊക്കെ ഇന്നും ജീവിച്ചിരിക്കുന്നതുകൊണ്ടാണ്‌ ഈ ലോകം ഇങ്ങനൊക്കെ നിലനില്‍ക്കുന്നത്‌.

വളരെ വൈകി ഇവിടെ എത്തിയ ആളാണ്‌ ഞാന്‍. ഈ പുരാണങ്ങളിലേക്കിനിയും ഇറങ്ങിയിട്ടില്ല. ഒരു സത്യം കൂടി. ഈ ലോകത്തേക്കു എത്തിനോക്കാന്‍ പ്രേരകമായത്‌ ഈ ഒരാളിന്റെ പേരുതന്നെയാണ്‌. മലയാളത്തോടു കാണിച്ച ഈ ഉപകാരത്തിനു നന്ദി.

Anonymous said...

nanmaye nalla reethiyil avatharippicha nallavanaaya vishhalanu namaskaaravum..ithine prosthsaahippaichu comments ayachavarodu athilere nanniyum...nanma avasheshichavar iniyum baakki...

shamzi said...

ente mashee..

ningaloru sambhavama...

Pramod said...

ഞെരിപ്പ് (അടിപൊളി) പോസ്റ്റ്!! :))
തമാശയും കാര്യവും നല്ല രീതിയില്‍ പറഞ്ഞിരിക്കുന്നു!!
ജെബല്‍ അലീല് പുരാണങ്ങള്‍ പ്രതീക്ഷിക്കാമോ??

cloth merchant said...

ameer khande mukhamulla mathrubhoomi azhchapathippine patti chindikkane kazhinjirunnilla.ennalum kuttamparayan vayya.tare zameen par ishtappetta oru cinima ayirunnathukondum "cinima endinu kadhaye prasavikkanam" enna thalevara kandathumkondanu ee mathrubhoomi azhchapathippu vangichathu.
pakshe ellathilum upari "blogana"enna oru sdhanam kanukayum athyarthiyode nokkiyappo vishala manaskan enna ezhuthu peru kanukayum cheythappol thanne santhoshamayi.vayichu theernnappol athyadhikam santoshavum.nalla manassum nalla kadhayum.
santosham vishala manaskan.

Logicmania said...

hello bosss...

ivide varaan karanam mathrubhoomi weekly anu...enthayalum katha kollam....gopiyettane anyoshichthayi parayooo.kodakarayil pokumpol...

ഭ്രുഗോധരന്‍ said...

kannu niranju poyi ente vishaaletaaa

Anonymous said...

its nice .....sathythil entu engane ezhutthnamennu rajeev kanichu tharunnu

Anonymous said...

ennittu?
kallane kittiyo?

Anonymous said...

നന്മ നിറഞ്ഞവന്‍ ഗോപിയേട്ടന്‍ ..........
ആ നല്ല മനുഷ്യന് എന്റെ സര്‍വമംഗളങ്ങളും ആശംസിക്കുന്നു..............
ആ വിശാല ഹൃദയനെക്കുറിച്ച് കുതികുറിച്ച വിശാലമനസ്കനായ അങ്ങേക്കും എന്റെ വന്ദനം ...........
ആ നീതിമാനെ തല്ലിയ നിര്‍വികാരരായ പോലീസ് യജമാന്‍സിനും നാട്ടുകാരെയും ഒന്നു ഓര്‍മ്മപെടുത്തുക .............
ആ മനുഷ്യന് ധാരയും കിഴിയും പിടിക്കാനുള്ള പണം നല്കാന്‍ ...........

Anonymous said...

thurannezhuthunnatanu nakllathu

ആമിക്കുട്ടി said...

adipoliyayittunde!!!!!!!!!!!

Nidheesh said...

Puthiya post onnum ille ?

മാനസ said...

appo karayikkaanum ariyaam..lle??
a gud lesson for all....really....!!!

sanu kodaly said...

ithu kalakki mashe..
njaan ithellam vaikiyaanu vaayichathu
ennalum vaayichittullathil valare attractive aayi thoniyathu ithaanu

manuannan said...

ഇത്രയും നാളും ചിരിപ്പിക്കുക മാത്രം ചെയ്ത വിശാലേട്ടന്‍ ഇത്തവണ കണ്ണുനനയിച്ചു.

നിരക്ഷരൻ said...

ഞാനിതിനെ കൂട്ടിക്കിഴിച്ച് പെരുക്കി ഹരിച്ച് എല്ലാ സാദ്ധ്യതകളും സ്വയം കാണാന്‍ ശ്രമിച്ചുകൊണ്ടിരിക്കുകയാ. ഇതൊരു തിരക്കഥ ആയാല്‍ എങ്ങനിരിക്കും? സംഭാഷണം എങ്ങനിരിക്കും? ശ്രീനിവാസന്‍ ആരുടെ റോളിലായിരിക്കും? (ഗോപ്യേട്ടന്‍ തന്നെ ആകാതെ തരമില്ല.) മീനാക്ഷേടത്തി ആ‍രായിരിക്കും ? ലൊക്കേഷന്‍ എവിടായിരിക്കും ? പൊലീസുകാരന്‍ എന്റെ സഹപാഠിയായ സലിംകുമാര്‍ തന്നെ ആയിരിക്കുമോ ? കൊടകരപുരാണങ്ങള്‍ വായിച്ച് കോരിത്തരിച്ച് ചിരിച്ച് കുടല്‍മാല വെളിയില്‍ വന്നിട്ടുള്ള വായനക്കാരും, ആരാധകരും അവരുടെ കുടുംബങ്ങളും മാത്രം തീയറ്ററില്‍ കയറിയാല്‍ 100 ആം ദിവസവും കഴിഞ്ഞ് എത്ര ദിവസം പിന്നേം ഹൌസ് ഫുള്ളായി ഓടും ?

ആലോചിച്ച് ഭ്രാന്ത് പിടിക്കുമെന്ന അവസ്ഥയായി. ഇനി വെള്ളിത്തിരയില്‍ കൊടകരപുരാണം തെളിഞ്ഞുകാണുന്നതുവരെ എന്റെ ചിന്തകള്‍ എന്നെ വേട്ടയാടും, പിച്ചിപ്പറിക്കും, മാന്തിപ്പൊളിക്കും.

എന്നാലും വേണ്ടീല്ല. ഭയങ്കര സന്തോഷം ആയി, വിശേഷം അറിഞ്ഞപ്പോള്‍ .

വേ ടു ഗോ വിശാല്‍ജീ. വേ ടു ഗോ :)
അഭിനന്ദനങ്ങള്‍..... :)

Unknown said...

വിശാലേട്ടാ കലക്കന്‍..... ശരിക്കും മനസ്സില്‍തട്ടിയ ഒരു കഥ

tom mangatt said...

വായിക്കാന്‍ വിട്ടുപോയ കഥകളിലൊന്നാണിത്. സജീവ് ഫോണ്‍ വച്ചയുടന്‍ തന്നെ വായിച്ചു; ഞാനും സ്വപ്‌നയും.. ശ്വാസമടക്കിപ്പിടിച്ച്‌. അതിമനോഹരം!

ജോക്കോസ് said...

ente kannu niranju ithu vayichu kazhinjapol...njanum ayale manasu kondu asleshikkunnu...oru makal achane enna pole....
visalamanaskanu nanni...

shyni jokos
kuwait

Unknown said...

kollaaaam.

Unknown said...

enne orupole chirippikkem kannu nanyikkem cheythu...ee ezhuthu..it s a perfect blend....great!

Nithin said...

valare nannayittundu.
sailiyum vishayavum. hridaysprshi aaya oru vishayam anaayasam aayi avatharippichirikkunnu.
comment ezhuthumbol malayalthil engane ezhuthanam ennu pidikittunnilla athinal ee manglishil ezhuthiyathu shamikukka

Anonymous said...

super ...........

Nomad said...

ee post 2008lethanegilum .. eeyide perumavoor nadanna kolapathakam ormannu .. busil pocket adichu ennu paranju alkar thalli konna kadhayude thread itha .. :(

Anonymous said...

Ethu shaju vettanodu chochittulla karyam thanne.. Eacharan Linto

Kalli Kanthari said...

is this a true story!!! Really touching one!!!!